ბათუმში, ბარცხანის დასახლებაში, სადაც რამდენიმე დღის წინ 13 წლის მოზარდი მატარებლის შეჯახების შედეგად დაიღუპა, ადგილობრივებმა საპროტესტო აქცია გამართეს.
დასახლებაში მცხოვრებლები ითხოვენ უსაფრთხოების სტანდარტების დაცვასა და სარკინიგზო გადასასვლელების მოწყობას იმ მონაკვეთზე, სადაც მოზარდი ტრაგიკულად გარდაიცვალა.
აქციის მონაწილეები ამბობენ, რომ ადგილი, სადაც შემთხვევა მოხდა, განსაკუთრებით სახიფათოა, რადგან რამდენიმე მეტრში საჯარო სკოლაა და ლიანდაგის გადაკვეთა ყოველდღიურად ათეულობით მოსწავლეს უწევს.
მათი თქმით, მატარებლები აღნიშნულ მონაკვეთზე ინტენსიურად და მაღალი სიჩქარით გადაადგილდებიან, რაც სერიოზულ რისკებს ქმნის როგორც ბავშვებისთვის, ისე სხვებისთვის.
მოსახლეობა განმარტავს, რომ წლების განმავლობაში არაერთხელ მიმართეს ბათუმის მერიასა და საქართველოს რკინიგზას, თუმცა შესაბამისი უწყებები უსაფრთხოების ზომების გატარებას დღემდე არ აპირებენ. მათი ინფორმაციით, ბოლო წლების განმავლობაში, ამავე სარკინიგზო ხაზზე 17-მდე ადამიანი ემსხვერპლა უბედურ შემთხვევებს.
ადგილობრივების თქმით, ამ ეტაპზე ლიანდაგზე გადასასვლელი თვითნებურად, კუსტარულად აქვთ მოწყობილი, რაც საფრთხეს კიდევ უფრო ზრდის. აქციის მონაწილეები მოითხოვენ, რომ დაუყოვნებლივ დაიწყოს უსაფრთხოების ინფრასტრუქტურის მოწყობა: დამონტაჟდეს ბარიერები, საგანგაშო ნიშნები და გზის გადამკვეთი უსაფრთხო ბილიკები.
