ახალშენში მცხოვრებლებმა კვლავ უწყვეტი წყალმომარაგების მოთხოვნით საპროტესტო აქცია გამართეს. ადგილობრივების თქმით, ზაფხულის ცხელ დღეებში სასმელი წყლის გარეშე ცხოვრება გაუსაძლისი გახდა.
მათი თქმით, წყალი დღის განმავლობაში ერთი საათითაც კი არ მიეწოდებათ. ისინი სასმელ წყალს წყაროებიდან ეზიდებიან, რის გამოც რამდენიმე კილომეტრის გავლა უწევთ. სოფელში მცხოვრებლები ხელისუფლებას მიმართავენ და დაპირების შესრულებას ითხოვენ.
“ელემენტარული, დასალევი წყალი არ გვაქვს, რატომ უნდა გავდიოდეთ კილომეტრებს? ამ პირობებში ჰიგიენის დაცვა რთულია. მდინარის წყალს მოვიხმართ. კვირაობით წყალი არ გვაქვს, ესაა სამართალი,” – აღნიშნეს მოქალაქეებმა აქციაზე.
ახალშენში სასმელი წყლის გარეშე მიქელაძეების უბანში, რამდენიმე ოჯახია. მათ “ნაციონალური მოძრაობის” წევრი შეხვდა. მიშა ბოლქვაძე შექმნილ ვითარებას კორუფციას უკავშირებს.
“ხალხის ხარჯზე მილიონებს იდებენ ჯიბეში და კიდევ აქვთ იმის სურვილი, რომ არჩევნებში გაიმარჯვოთ. მაშინ, როცა წყლის სისტემებზე მილიონები დაიხარჯა, დღესაც მოსახლეობა სასმელი წყლის გარეშეა,” – განაცხადა მიშა ბოლქვაძემ მოსახლეობასთან შეხვედრისას.
ხელვაჩაურის მერიაში ტრადიციულად განმარტეს, რომ პრობლემა წყლის დებეტის სიმცირით არის გამოწვეული.
