აიპ „ქობულეთის საბავშვო ბაღების გაერთიანებას“ ახალი დირექტორი ჰყავს. გუშინ, გვიან ღამით ცნობილი გახდა, რომ დაწესებულების ხელმძღვანელად ირმა მეგრელიძე დაინიშნა. იგი მანამდე ქობულეთის კოლეჯ „ახალი ტალღა“-ს დირექტორის პოზიციას იკავებდა.
„აჭარა თაიმსის“ ხელთ არსებული ინფორმაციით, ირმა მეგრელიძის დანიშვნის პროცესში იყვნენ ჩართული საპატრიარქო და ადგილობრივი ეპარქია. როგორც ცნობილია, ირმა მეგრელიძის მეუღლე სასულიერო პირია და ქობულეთის ერთ-ერთ ტაძარში მსახურობს.
ქობულეთის მერს რამდენიმე დღის წინ „აჭარა თაიმსმა“ პირდაპირ მიაწოდა ინფორმაცია, რომ საბავშვო ბაღების გაერთიანების დირექტორის პოზიციაზე ირმა მეგრელიძის დანიშვნა იგეგმებოდა, თუმცა ირაკლი ცეცხლაძემ ეს ინფორმაცია არ დაადასტურა და კატეგორიულად უარყო. დღეს კი, მას შემდეგ რაც ჩვენს მიერ დასახელებული პირი ოფიციალურად წარადგინეს აღნიშნულ თანამდებობაზე, ქობულეთის მერიამ გადაწყვეტილება მეგრელიძის კვალიფიკაციითა და პროფესიული გამოცდილებით ახსნა.
ცნობისთვის, ახალი დირექტორის დანიშვნას წინ უძღოდა ქობულეთის საბავშვო ბაღების გაერთიანების ყოფილი ხელმძღვანელის, ია ხალვაშის, თანამდებობიდან გათავისუფლება. მისი შესაძლო გათავისუფლების შესახებ „აჭარა თაიმსი“ რამდენიმე დღის წინ წერდა, რაც მოგვიანებით დადასტურდა.
ია ხალვაშის საქმიანობასთან დაკავშირებით სოციალურ ქსელში მწვავე დისკუსია მიმდინარეობდა. მოქალაქეების ნაწილი რეალური პროფილებიდან წერდა შესაძლო კორუფციულ პრაქტიკებზე, მათ შორის – ბაღებში დასაქმებისა და ბავშვების მიღების სანაცვლოდ თანხის მოთხოვნაზე. ბრალდებები სიმართლეს შეესაბამება თუ ცილისწამებას წარმოადგენს, ამ ეტაპზე დაუდგენელია.
ქობულეთის მერიას სოციალურ ქსელში გავრცელებულ ბრალდებებზე საჯარო რეაგირება არ მოუხდენია. უწყებაში „აჭარა თაიმსს“ განუცხადეს, რომ მსგავსი კომენტარების შეფასება მათი კომპეტენცია არ არის.
