„ხელისუფლების წნეხი ზოგადსაგანმანათლებლო სისტემაზე ძალიან დიდია, არცერთ მმართველ პარტიას არ მოსწონებია დამოუკიდებელი, ავტონომიური, ნომენკლატურულ დღის წესრიგს გაცდენილი მასწავლებელი და დარწმუნებული ვართ, რომ ეს წნეხი კიდევ უფრო გაძლიერდება,“ – ეს ამონარიდი იმ პეტიციიდან არის, რომელიც პედაგოგებმა შეიმუშავეს. მასწავლებლები ამ ფორმით რუსულ კანონს ეწინააღმდეგებიან
მათი მოსაზრებით, დღეს თუ არ დავარქვით სახელი მოვლენებს, ხვალ უკვე შესაძლებლობაწართმეულ საქართველოში გავიღვიძებთ და საკლასო კედლებში არც დემოკრატიის პრინციპებზე საუბარს ექნება აზრი და არც ქართული მატერიალური თუ არამატერიალური კულტურის ძეგლების მნიშვნელობაზე.
ინფორმაციისთვის: პეტიციის ავტორები მასწავლებლის ეროვნული ჯილდოს გამარჯვებულები: ლადო აფხაზავა, გიორგი ჭაუჭიძე, სოფო გოგოხია, როლანდ შავაძე არიან.
რატომ არის მნიშვნელოვანი გაგაჩნდეს პოზიცია, მაშინ, როცა საქმე ქვეყნის მომავალს ეხება – ამ თემაზე „აჭარა თაიმსი“ პეტიციის ერთ-ერთ ინიციატორს ესაუბრა.
» როლანდ შავაძე, მასწავლებლის ეროვნული ჯილდოს მფლობელი:
ბევრი არასამთავრობო ორგანიზაცია არაერთ პროექტს ახორციელებს საქართველოში, ცხადია მათი უმრავლესობა აგენტად რეგისტრაციას არ აპირებს, შესაბამისად საზოგადოება სერვისების გარეშე რჩება. ასევე, ქვეყანა დაკარგავს ავტორიტეტულ ორგანიზაციებს.
ახლა, რაც შეეხება პედაგოგების პოზიციებს – გარდა იმისა, რომ საგაკვეთილო და საგანმანათლებლო პროცესების კვალიფიციურად წარმართვის ვალდებულება გაგვაჩნია, ასევე, იმის ვალდებულებაც გვაქვს რომ სკოლის მიღმა სამოქალაქო აქტივიზმში ვიყოთ ჩართულები. დღეს ქვეყანაში ასეთი მწვავე პრობლემაა, ქვეყანა პოლიტიკურ კურსს ცვლის და ევროპის ნაცვლად მიგვაქანებენ რუსეთისკენ, ამ შემთხვევაში, როგორც მოქალაქეებმა ჩვენი პოზიცია უნდა დავაფიქსიროთ. ჩვენი ხმა უნდა ისმოდეს, რადგან ჩვენს უკან დიდი საზოგადოებაა და ვიღაცისთვის მასწავლებლები ავტორიტეტები ვართ. შესაბამისად ჩვენი ხმა უნდა ისმოდეს.
საჯარო სკოლების ცალკეული მასწავლებლები საჯარო პოზიციებით გამოირჩევიან, რასაც ვერ ვიტყვით კერძო სექტორზე. სამწუხაროდ კერძო სკოლები არ არიან მთლად თავისუფლები სამინისტროსგან. ეს იმიტომ რომ, ისინი ავტორიზაციის თემით მიბმულები არიან უწყებასთან. ამ ფაქტორის გამო, კერძო საგანმანათლებლო დაწესებულებები პოზიციას ვერ აფიქსირებენ, მათ შიში აქვთ წნეხის.
„აჭარა თაიმსი“ კერძო სკოლების პოზიციითაც დაინტერესდა. ბათუმში, 20-მდე საგანმანათლებლო დაწესებულებაა. ჩვენ ყველა მათგანთან გასაუბრების მცდელობა გვქონდა, თუმცა ზოგიერთმა მათგანმა ოფიციალურ ვებგვერდზე მითითებულ ნომერზე არ გვიპასუხა. კერძო სკოლების ნაწილთან კომუნიკაცია შედგა, თუმცა ინტერვიუ არა. როგორც კი რუსულ კანონს ვახსენებდით სხვადასხვა, დაუსაბუთებელი მიზეზით, ისინი სატელეფონო საუბრის შეწყვეტას ითხოვნდნენ.
» ვინაიდან კერძო სკოლების წარმომადგენლებთან ვრცელი ინტერვიუ არ შედგა, გთავაზობთ გასაუბრების მცირე ფრაგმენტებს:
- სკოლა ნიკე:
ჩვენი სკოლა კერძო სტრუქტუურაა, შესაბამისად ამ თემაზე კომენტარს არ ვაკეთებთ.
- ქართულ-ამერიკული სკოლა:
თქვენთვის რა მნიშვნელობა აქვს რა პოზიცია გვექნება? კომენტარს არ ვაკეთებთ ამ თემაზე.
- სკოლა თამარისი:
პოლიტიკურ საკითხებზე კომენტარს არ ვაკეთებთ. მითუმეტეს მაგ კანონზე ვერაფერს გეტყვით.
- მასტერკლასი სკოლა-ლიცეუმი:
რა თქმა უნდა რუსული კანონის წინააღმდეგი ვართ ყველა ვინც, ჩვენი ქვეყნის მომავალზე ვფიქრობთ. ეს ჩემი პირადი აზრია.
- მეგა სკოლა:
ვერ გიპასუხებთ კითხვაზე.
- მომავლის სკოლა:
არა რუსულ კანონს! ქართული სულისკვეთებით, ევროპული გამოცდილებით – ეს არის ჩვენი პოზიცია. სკოლა აპოლიტიკურია, თუმცა ვასწავლით იმას, რათა განვითარდეთ სამომავლოდ. ოკუპანტს როგორც წესია ისე უნდა ვუპასუხოთ, მაგრამ ვიმეორებ ჩვენ აპოლიტიკურები ვართ. არ ვარ ამ საკითხის ექსპერტი, მაგრამ სკოლასთან ნუ მაიგივებთ, ჩემი პირადი მოსაზრებაა რომ არ უნდა მიეღოთ ეს კანონი.
— ამერიკულ საერთაშორისო სკოლა პროგრესის ადმინისტრაციასაც დავუკავშირდით, თუმცა თემაზე დაწესებულებაში კომენტარი არ გააკეთეს.
აქვე დაგაინტერესებთ ⇓
- გრანტები რუსული კანონის მხარდამჭერ მერიებს
- რუსული კანონის ამოქმედებამდე სულ ცოტა დრო რჩება – რას აპირებს რეგიონული მედია
