“აჭარა თაიმსი” დაინტერესდა აჭარის მუნიციპალიტეტებში გამწვანების კუთხით რა კეთდება. ხუთივე მუნიციპალიტეტიდან საჯარო ინფორმაცია გამოვითხოვეთ, თუმცა ხელვაჩაურისა და შუახევის მერიებმა, ერთთვიანი ლოდინის მიუხედავად წერილზე არ გვიპასუხეს.
2023 წელს ქობულეთში საერთო ჯამში, 446 ხე დაირგო, საიდანად 136 უწყებამ ტენდერის საშუალებით იყიდა, რაშიც 93 396 ₾არი დაიხარჯა. უწყებაში არ დაგვიკონკრეტეს ის ადგილები, სადაც ხეები დარგეს.
“მუნიციპალიტეტის სხვადასხვა ტერიტორიაზე დაირგო 100 ფოტინია, 36 იუნიპერის ფტიზერიანა გლაუკა,” – წერია ქობულეთის მერიისგან მოწოდებულ საჯარო ინფორმაციაში.
ინფორმაციისთვის: ქობულეთის სანაპიროზე ყოველწლიურად, ათეულობით უნიკალურ ფიჭვს ჭრიან. ქარსაცავი ზოლი მასობრივად ბოლოს, ეკლესიის მიმდებარე ტერიტორიაზე გაიჩეხა. დამატებითი ინფორმაცია ამ თემაზე ნახეთ ბმულზე.
ქედის მერიიდან მოგვწერეს, რომ მუნიციპალიტეტში გამწვანების სამსახური არაა, დაბის ტერიტორიაზე კი ხეებს სხვადასხვა ღონისძიების ფარგლებში რგავენ.
“2023 წელს კულტურული ღონისძიებების ქვეპროგრამის ფარგლებში, დედამიწის დღესთან დაკავშირებით განათლების, კულტურის, სპორტის, ტურიზმის, ახალგაზრდულ საკითხთა და ძეგლთა დაცვის სამსახურმა 10 ძირი ტუიას ხე შპს ,,ზენდიდი 2015“-ისგან 501 ლარში შეიძინა და დაბა ქედაში, ყედირ შერვაშიძის სახელობის პარკში დარგო,” – განუცხადეს AJARATIMES.GE-ის ქედის მერიაში.
ქედის მერიაში ასევე, განმარტეს, რომ გასულ წელს შპს ,,ქედის კომუნალურსერვისმა“ 25 მარაოსებრი პალმის ხე შეიძინა, რაშიც 2000 ₾არი გადაიხადეს, ხეები კი დაბა ქედაში, ფრიდონ ხალვაშის სახელობის ცენტრალური პარკის მიმდებარე ტერიტორიაზე დარგეს.
ქედის მსგავსად, გამწვანების სამსახური არც ხულოს მერიაშია. მუნიციპალიტეტში, დაბის ტერიტორიაზე გასულ წელს ხეები არ დაურგავთ.
უწყებაში ჩვენი წერილის საპასუხოდ განმარტეს, რომ 2023 წელს, მათ აჭარის სატყეო სააგენტოსგან უსასყიდლოთ გადაეცა 150 ფიჭვის, ამდენივე კედარის და 30 არყის ნერგი. მერიამ კი ნაჩუქარი ხეები კურორტ ბეშუმის ტერიტორიაზე დარგო.
