ადამიანის უფლებათა ევროპულმა სასამართლომ ე.წ. განგრძობადი ოკუპაციის საქმეზე რუსეთს კონვენციის არაერთი მუხლის დარღვევა დაუდგინა. საქმე 2008 წლის ომის შემდეგ დაწყებულ ე.წ. ბორდერიზაციის პროცესსა და ადამიანის უფლებების დარღვევას ეხება.
ევროპულმა სასამართლომ დაადგინა, რომ რუსეთმა დაარღვია კონვენციის მე-2 (სიცოცხლის უფლება), მე-3 (არაადამიანური ან ღირსების შემლახავი მოპყრობის აკრძალვა), მე-5 მუხლის პირველი პუნქტის (თავისუფლებისა და უსაფრთხოების უფლება) და მე-8 (პირადი და ოჯახური ცხოვრების დაცულობის უფლება).
ევროსასამართლო მიუთითებს, რომ 2008 წლის აგვისტოში საქართველოსა და რუსეთს შორის შეიარაღებულმა კონფლიქტმა გამოიწვია პროცესი, რომელიც 2009 წელს დაიწყო და ბორდერიზაციის სახელითაა ცნობილი. აღნიშნულია, რომ ამით ადამიანებს ეკრძალებათ “საქართველოს მიერ კონტროლირებად ტერიტორიასა და რუსეთის მიერ მხარდაჭერილ რეგიონებს, აფხაზეთსა და სამხრეთ ოსეთს შორის ადმინისტრაციული სასაზღვრო ხაზის თავისუფლად გადაკვეთა”.
ინფორმაციისთვის: სტრასბურგის ადამიანის უფლებათა ევროპულ სასამართლოში საქართველოს რუსეთის წინააღმდეგ კიდევ 3 საჩივარი აქვს შეტანილი. გარდა ამისა, სასამართლოს განსახილველი აქვს ჯამში 200-მდე ინდივიდუალური საჩივარი, როგორც საქართველოს, ასევე, რუსეთის ან ორივე სახელმწიფოს წინააღმდეგ, რომელიც 2008 წლის შეიარაღებულ კონფლიქტს ან ე.წ. ბორდერიზაციის პროცესს უკავშირდება.
