ადიგენის მუნიციპალიტეტში მიმდინარე მოვლენებს ბათუმში სოლიდარობის აქციით გამოეხმაურნენ.
მუსლიმები ორთაჯამეს მიმდებარე ტერიტორიაზე შეიკრიბნენ და ხელისუფლებას მიმართეს.
ისინი სამართალდარღვევებზე შესაბამის რეაგირებას ითხოვენ. მათი თქმით, მორწმუნეებს ლოცვის შესაძლებლობა უნდა მიეცეთ.
“ეს არის სოლიდარობის აქცია, ჩვენ ადიგენში მიმდინარე მოვლენებს ვეხმაურებით ამ ფორმით. მხარდაჭერას ვუცხადებთ მუნიციპალიტეტში მცხოვრებ მუსლიმებს. მნიშვნელოვანია სახელმწიფომ ქმედითი ნაბიჯები გადადგას, რათა თავიდან ავიცილოთ უფრო დიდი დაპირისპირება. ჩვენ გვაქვს ამის გამოცდილება სხვაგან. სახელმწიფომ საქმით უნდა გვაჩვენოს ყველაფერი და ეს მხოლოდ სიტყვიერი თანადგომა არ იყოს. ვინც დანაშაულს ჩადის შესაბამისად იქნას პასუხისგებაში მიცემული,” – გადაცხადა აქციაზე მყოფმა სამოქალაქო აქტივისტმა ჰურიე აბაშიძემ.
ინფორმაციისთვის: ადგილობრივი მედია TOK TV-ის ცნობით, დაბა ადიგენში, წერეთლის 10 ნომერში მდებარე სახლში მართმადიდებლები მუსლიმებს ლოცვის შესაძლებლობას არ აძლევენ.
ორი დღის წინ, მღვდლები მრევლთან ერთად შენობაში შეჭრას ცდილობდნენ. შემთხვევის ადგილზე პოლიცია იყო მობილიზებული, რომელიც მედიას მუშაობის შესაძლებლობას არ აძლევდა.
საპატრიარქოს მომხდართან დაკავშირებით ოფიციალური ინფორმაცია ამ დრომდე არ გაუვრცელებია.
