„ქართული ოცნება“ მისსავე პარლამენტს კანონპროექტს წარუდგენს, რომელიც შეკრებებისა და მანიფესტაციების დროს გარკვეული ქმედებებისთვის ადმინისტრაციული და სისხლის სამართლის პასუხისმგებლობას ამკაცრებს. ცვლილებები შეეხება როგორც ადმინისტრაციულ სამართალდარღვევათა, ისე სისხლის სამართლის კოდექსს.
პარტიის წარმომადგენლის, ირაკლი კირცხალიას განცხადებით, ახალ რეგულაციათა მიხედვით, 15 დღემდე ადმინისტრაციული პატიმრობით დაისჯება შეკრების ან მანიფესტაციის მონაწილე, რომელიც:
- სახეს დაიფარავს ნიღბით ან სხვა საშუალებით;
- იქონიებს ცრემლსადენ, ნერვულ-პარალიტიკური ან მომწამვლელი მოქმედების ნივთიერებას;
- განზრახ შექმნის დაბრკოლებებს ტრანსპორტისა ან ადამიანების გადაადგილებისთვის;
- მოაწყობს დროებით კონსტრუქციას, რომელიც საფრთხეს უქმნის მონაწილეებს ან ხელს უშლის პოლიციას საზოგადოებრივი წესრიგის დაცვაში;
- თუ სამართალდამრღვევად ჩაითვლება აქციის ორგანიზატორი, მას 20 დღემდე პატიმრობა ემუქრება;
გარდა ამისა, ცვლილებებით 60 დღემდე ადმინისტრაციული პატიმრობა დაეკისრება პირს, რომელიც მიიღებს მონაწილეობას იმგვარ აქციაში, რომელიც შსს-ს მოთხოვნით შეწყვეტას ექვემდებარება, ან შეკრებისას იქონიებს იარაღს, პიროტექნიკას ან სხვა საშიშ საგანს, რომელიც შეიძლება ზიანის მისაყენებლად იქნას გამოყენებული.
კირცხალიას განცხადებით, აღნიშნული ქმედებების განმეორებით ჩადენა უკვე გამოიწვევს სისხლის სამართლის პასუხისმგებლობას ერთ წლამდე ვადით, ხოლო მესამე და ყოველი შემდგომი შემთხვევა დაისჯება ორი წლამდე პატიმრობით.
ცვლილებები შეეხება „პოლიციელების მიმართ უპატივცემულო“ დამოკიდებულებასაც: ახალი მუხლით, პირს, რომელიც პოლიციელს მესამედ მიაყენებს შეურაცხყოფას ან არ დაემორჩილება მის განკარგულებას, დაეკისრება ერთ წლამდე თავისუფლების აღკვეთა, ხოლო რეციდივის შემთხვევაში – ორ წლამდე პატიმრობა.
