AJARATIMES.GE-ის ინფორმაციით, ქობულეთის მერიამ სამხედრო კომისარიატის შენობა გაყიდა, რომელშიც ასევე, სოციალური მომსახურების სააგენტო იყო განთავსებული. თავისუფლების ქუჩის N13-ში 1177 კვ.მ. ტერიტორიისა და ორსართულიანი შენობის მესაკუთრე მანანა ტუნაძე გახდა, რომელიც საქართველოსა და რუსეთის მოქალაქეა.
ქობულეთის მერიამ საკრებულოს არსებულ მიწის ნაკვეთზე მრავალფუნქციური კომპლექსის მშენებლობის მიზნით განაშენიანების დეტალური გეგმის კონცეფციის დამტკიცების შესახებ უკვე მიმართა.
გეგმარებითი დოკუმენტის მიხედვით ირკვევა, რომ ტერიტორიაზე ორიანის ნაცვლად 11 სართულიანი აშენდება. შენობის პირველი სართული კომერციული დანიშნულების იქნება, მომდევნო სამ სართულზე ამბულატორია განთავსდება, ხოლო დარჩენილი ფართი საცხოვრებელად გაიყიდება.
AJARATIMES.GE-ის ქობულეთის მერიაში განუცხადეს, რომ საკუთრება ნახევარ მილიონ ლარზე მეტად, პირობით გაყიდეს. ხელშეკრულების თანახმად, მესაკუთრე ვალდებულია 50 ადგილობრივი დაასაქმოს, ასევე, შენობის მინიმუმ 20 პროცენტი სამედიცინო დაწესებულება უნდა იყოს.
