„დინამო ბათუმი“ საქართველოს დავით ყიფიანის სახელობის თასის ნახევარფინალში გავიდა. „თოლიებმა“ დაძაბულ და რთულ მატჩში 2:4 დაამარცხეს „ქუთაისის ტორპედო“ და შემდეგი ეტაპის საგზური მოიპოვეს.
1/4-ფინალის შეხვედრა „ბათუმელებისთვის“ პოზიტიურად დაიწყო. მატჩის მე-11 წუთზე უერდი მარამ 11-მეტრიანი გაიტანა და გუნდი დააწინაურა.
„ქუთაისელებმა“ შეხვედრის ანგარიში 35-ე წუთზე ანდრიჩის გოლით გაათანაბრეს, ხოლო 45+3-ე წუთზე დეისაძემ „ტორპედო“ დააწინაურა.
მატჩის 77-ე წუთზე „დინამო ბათუმის“ ახალწვეულმა ომრან იმრანმა ანგარიშის გათანაბრება მოახერხა და მატჩი დამატებით დროში გადაიყვანა.
ექსტრა-ტაიმი „თოლიების“ სასარგებლოდ წარიმართა: 103-ე წუთზე მარამ თერთმეტმეტრიანების დუბლი შეასრულა, ხოლო ფინალური, მეოთხე გოლი 120-ე წუთზე „დინამოს“ ახალწვეულმა მაურიდესმა გაიტანა.
„ტორპედოსთან“ გამარჯვებით „დინამო ბათუმი“ ყიფიანის თასის ნახევარფინალშია, თუმცა „თოლიების“ მეტოქის ვინაობა ამ ეტაპზე უცნობია.
ავტორი: დიმიტრი გორგილაძე
