ხულოს მუნიციპალიტეტის სოფელ სხანდარაში, ადგილობრივების ინფორმაციით, რამდენიმე თვეა უცნობი პირები მიწას თხრიან. სოფლის მცხოვრებლების თქმით, მათთვის უცნობია სამუშაოების ზუსტი მიზანი, თუმცა ვარაუდობენ, რომ პირები ტერიტორიაზე ძვირფასეულობას, კერძოდ ოქროს ეძებენ.
ადგილობრივების თქმით, გათხრების შესახებ სოფელმა მოგვიანებით შეიტყო. ამის შემდეგ მათ შესაბამის უწყებებს მიმართეს, მათ შორის, ადგილობრივ მერიას, პოლიციას, გარემოსდაცვით უწყებებსა და საქართველოს პრემიერ-მინისტრს.
მათი თქმით, ადგილზე სხვადასხვა უწყების წარმომადგენლებიც იმყოფებოდნენ და არსებული ვითარება შეისწავლეს, თუმცა სამუშაოების შეჩერება არ მომხდარა.
„თავიდან ვერ შევამჩნიეთ, რა ხდებოდა. როდესაც გავიგეთ, უკანონო გათხრები მიმდინარეობდა, შემდეგ მივმართეთ ყველა უწყებას. ადგილზე იყვნენ ადგილობრივი მერიიდან, პოლიცია იყო, გარემოსდაცვითი უწყებიდან, შეისწავლეს არსებული ვითარება, თქვეს, რომ საფრთხე ნამდვილად არსებობს. მიუხედავად ამისა, არავინ არაფერი გააკეთა, პრემიერსაც მივმართეთ, მაგრამ არაფერი. რა ხდება რეალურად არავინ გვითხრა. ჩვენი ინფორმაციით, ოქროს ეძებენ,“ – გვიყვებიან სოფელში მცხოვრებლები.
ადგილობრივები ამბობენ, რომ სოფლის თავში დიდი ზომის ლოდებიც ამოთხარეს, რაც, დამატებით საფრთხეს ქმნის. მათი თქმით, სოფელი მეწყერსაშიშ ზონაში მდებარეობს და მიწის მასების ინტენსიურმა ამოღებამ შესაძლოა ბუნებრივი პროცესები გაააქტიუროს.
„საფრთხეს იმაში ვხედავთ, რომ ქვემოთ ორი მოსახლე ვცხოვრობთ, რომლებსაც ადგილმონაცვლეობის საშუალება არ გვაქვს. ზვავსაშიშ ზონაში ვცხოვრობთ. ამოღებული დიდი ზომის ქვები, ლოდები, ესენი რომ გადმოგორდეს, ამ ორ მოსახლეს გაგვანადგურებს, მოსალოდნელია მსხვერპლიც,“ – ამბობენ ადგილობრივები.
სოფლის მცხოვრებლების თქმით, მას შემდეგ, რაც მათი მიმართვები შესაბამის უწყებებზე რეაგირების გარეშე დარჩა, გადაწყვიტეს საკითხზე მედიასთან ესაუბრათ.
ხულოს მერიაში ჩვენს კითხვებს არ უპასუხეს.
