ფინანსთა სამინისტროს საგამოძიებო სამსახურის ინფორმაციით, თანამშრომლებმა სამ სხვადასხვა სისხლის სამართლის საქმეზე ქრთამის აღებისა და კომერციული მოსყიდვის ფაქტები გამოავლინეს. დაკავებულია სამი პირი.
უწყების ცნობით, ერთ-ერთი საქმის გამოძიებით დადგინდა, რომ აჭარის სატყეო სააგენტოს ხულოს სატყეო ადმინისტრაციის ტყის მცველმა, ნ.ბ.-მ, სახელმწიფო ტყის ფონდის ნაკვეთით სარგებლობის სანაცვლოდ მოქალაქისგან 1 000 აშშ დოლარი ქრთამის სახით აიღო.
საგამოძიებო სამსახურის განცხადებით, იგი თანხის აღების დროს, დანაშაულის ადგილზე დააკავეს.
კიდევ ერთ საქმეზე გამოძიებამ დაადგინა, რომ სურსათის ეროვნული სააგენტოს რაჭა-ლეჩხუმისა და ქვემო სვანეთის რეგიონული სამსახურის ვეტერინარმა, ა.ლ.-მ, დადგენილი პროცედურების გვერდის ავლით, დაურეგისტრირებელი საქონლის იდენტიფიკაცია-რეგისტრაციის სანაცვლოდ მოქალაქისგან 650 ლარი ქრთამის სახით აიღო.
ამ საქმეზე გამოძიება საქართველოს სისხლის სამართლის კოდექსის 338-ე მუხლის პირველი ნაწილით მიმდინარეობს, რაც ქრთამის აღებას გულისხმობს და სასჯელის სახით 6-დან 9 წლამდე თავისუფლების აღკვეთას ითვალისწინებს.
რაც შეეხება მესამე საქმეს, გამოძიების ინფორმაციით, შპს „საქართველოს მყარი ნარჩენების მართვის კომპანიის“ ოპერატორმა, ბ.ზ.-მ, ქვემო ქართლის რეგიონში მდებარე ნაგავსაყრელზე ნარჩენების უნებართვოდ განთავსების სანაცვლოდ მოქალაქეს 500 ლარი მოსთხოვა და გამოართვა. იგი თანხის აღების დროს საგამოძიებო სამსახურის თანამშრომლებმა დააკავეს.
აღნიშნულ ფაქტზე გამოძიება საქართველოს სისხლის სამართლის კოდექსის 221-ე მუხლით, კომერციული მოსყიდვის ფაქტზე მიმდინარეობს.
