შეკვეთილში, ბიძინა ივანიშვილის საცხოვრებელთან თვითდასაქმებულების საპროტესტო აქცია გაიმართა. ადგილზე ბათუმში სუვენირებითა და ნატურალური წვენებით მოვაჭრეები შეიკრიბნენ.
აქციის მონაწილეების განცხადებით, შეკვეთილში ჩასვლა მას შემდეგ გადაწყვიტეს, რაც მათთან შეხვედრას არც ბათუმის მერიის და არც აჭარის მთავრობის წარმომადგენლები დათანხმდნენ. მათი თქმით, უკვე ერთ თვეზე მეტია ელოდებიან პასუხს – შეძლებენ თუ არა ეკონომიკური საქმიანობის გაგრძელებას, თუმცა საკითხი კვლავ გაურკვეველია.
მოვაჭრეები აღნიშნავენ, რომ მათ სავაჭრო ჯიხურები ბათუმის მერიამ ჩამოართვა. გადაწყვეტილების მიზეზად ქალაქის იერსახის შენარჩუნება და კონსტრუქციების უსახურობა დასახელდა.
საუბარია ბათუმში, გოგებაშვილის ქუჩასა და ბულვარში წლების განმავლობაში მოქმედ სავაჭრო ობიექტებზე, სადაც ადგილობრივები სუვენირებით ვაჭრობდნენ. მათი თქმით, აღნიშნული ჯიხურები თავის დროზე სწორედ „ქართული ოცნების“ გადაწყვეტილებით განთავსდა, თუმცა წლების შემდეგ მათ ჩამოართვეს, რის გამოც შემოსავლის გარეშე დარჩენის საფრთხის წინაშე დგანან.
