შინაგან საქმეთა სამინისტროს გენერალურმა ინსპექციამ აჭარის დაცვის პოლიციის მთავარი სამმართველოს უფროსი, 1981 წელს დაბადებული კარლო ურუშაძე დააკავა. მას სამსახურებრივი უფლებამოსილების ბოროტად გამოყენებასა და სამსახურებრივ სიყალბეს ედავებიან.
გამოძიების ინფორმაციით, ურუშაძე მის დაქვემდებარებაში მყოფ თანამშრომელს პერიოდულად ავალებდა არაგაბარიტული ტვირთების დაცვა-გაცილების შესახებ ოფიციალურ დოკუმენტებში ყალბი მონაცემების შეტანას. კერძოდ, აღნიშნულ დავალებებში ფიქსირდებოდა პირები, რომლებიც რეალურად აღნიშნულ საქმიანობაში არ მონაწილეობდნენ, თუმცა მათ სახელზე ფულადი დანამატები ირიცხებოდა.
კარლო ურუშაძე ბრალდებულის სახით მოსამართლის განჩინების საფუძველზე დააკავეს. გამოძიება სისხლის სამართლის კოდექსის 332-ე მუხლის პირველი ნაწილითა და 341-ე მუხლით მიმდინარეობს, რაც სასჯელის სახით 2-დან 4 წლამდე თავისუფლების აღკვეთას ითვალისწინებს.
