გარემოსდაცვითი ზედამხედველობის დეპარტამენტის ინფორმაციით, უკანონო ტყითსარგებლობის წინააღმდეგ გატარებული ღონისძიებების ფარგლებში სამართალდარღვევები გამოვლინდა აჭარის ორ მუნიციპალიტეტში, ხულოსა და შუახევში.
დეპარტამენტის ცნობით, დაბა ხულოში, ასევე სოფლებში ოქროაშვილებსა და გოგნიაურში, ამოღებულია უკანონოდ მოპოვებული წიწვოვანი სახეობის 42 მრგვალი ხე-ტყე (მორი).
რაც შეეხება შუახევის მუნიციპალიტეტს, აქ გამოვლენილი ფაქტი სისხლის სამართლის დანაშაულის ნიშნებს შეიცავს. შესაბამისი მასალები შემდგომი რეაგირების მიზნით უკვე გადაგზავნილია შესაბამის უწყებაში.
დეპარტამენტის მონაცემებით, ბრაკონიერობასთან ბრძოლისა და მკაცრი კონტროლის ფარგლებში, გასულ წელს მხოლოდ აჭარისა და გურიის რეგიონებში ტყით უკანონო სარგებლობის დაახლოებით 400 ფაქტი გამოვლინდა.
