მთავრობის თავჯდომარემ უმაღლესი საბჭოს დელეგატები წარადგინა. აჭარის ექვსივე მუნიციპალიტეტს კაცი კანდიდატები წარმოადგენენ. აღნიშნული დელეგატები „ქართული ოცნების“ სიაში უმაღლეს საბჭოში გამსვლელ ადგილზე იქნებიან.
“ყველა მათგანს კარგად იცნობენ აჭარაში როგორც პროფესიონალ, კეთილსინდისიერ, კვალიფიციურ, პატრიოტ და ხალხის კეთილდღეობაზე ორიენტირებულ საჯარო მოხელეებს, პოლიტოკოსებს,” – განაცხადა თორნიკე რიჟვაძემ კანდიდატების წარდგენისას ბრიფინგზე.
აჭარის მთავრობის თავჯდომარემ ასევე, აღნიშნა, რომ ძირითადი კრიტერიუმები, რითაც შეირჩა დელეგატები და რაც გახლდათ წარდგენის საფუძველი, არის პროფესიონალიზმი და კეთილსინდისიერება.
“26 ოქტომბერს საქართველოს საპარლამენტო არჩევნებთან ერთად, ტარდება აჭარის ავტონომიური რესპუბლიკის უმაღლესი საბჭოს არჩევნები. შესაბამისად, დღეს ძალიან მნიშვნელოვანი დღეა, ვინაიდან მსურს წარმოგიდგინოთ დელეგატები ,,ქართული ოცნებიდან”, რომლებიც წარმოდგენილი იქნებიან როგორც წამყვან პოზიციებზე უმაღლეს საბჭოში საკონსტიტუციო უმრავლესობის დაკომპლექტების მიზნით, ასევე, ისინი გაუძღვებიან აჭარის ექვსივე მუნიციპალიტეტში შესაბამის საარჩევნო კამპანიას.
ბათუმიდან ჩვენი დელეგატი გახლავთ ბატონი რამაზ ჯინჭარაძე, რომელსაც განსაკუთრებული წარდგენა არ ჭირდება. საკრებულოს მოქმედი თავმჯდომარე, რომელსაც არაერთი მნიშვნელოვანი სოციალური პროექტის განხორციელება უკავშირდება, როგორც აჭარაში, ასევე ბათუმში.
ქობულეთიდან ჩვენი დელეგატი იქნება მოქმედი მაჟორიტარი ბატონი ცოტნე ანანიძე, ადამიანის უფლებათა კომიტეტის თავმჯდომარე.
ხელვაჩაურში დელეგატი იქნება ბატონი მინდია დიასამიძე, საკრებულოს პირველი მოადგილე, რომელმაც ძალიან კარგად იცის ხელვაჩაურის საჭიროებები და არსებული გამოწვევები.
ქედაში ჩვენი დელეგატი იქნება ბატონი მამუკა თურმანიძე, ფინანსთა და ეკონომიკის მინისტრის მოადგილე, მანამდე ის გახლდათ აჭარის საავტომობილო გზების დეპარტამენტის უფროსი.
შუახევში დელეგატი იქნება ბატონი ფრიდონ ფუტკარაძე, მოქმედი მაჟორიტარი და აგრარული კომიტეტის თავმჯდომარე უმაღლეს საბჭოში.
ხულოში ჩვენი დელეგატი იქნება ბატონი ვახტანგ ბერიძე, მოქმედი მერი, რომელმაც ძალიან კარგად იცის ხულოს წინაშე არსებული გამოწვევები და ის ნამდვილად გახლავთ ამ მუნიციპალიტეტის ძალიან დიდი საყრდენი,” – განაცხადა თორნიკე რიჟვაძემ.
