ბათუმის ბულვარის ტერიტორიაზე თვითდასაქმებულები აჭარის მთავრობასთან აქცია მართავენ. ისინი თავიანთი ბიზნესის ორგანიზებისთვის ფართის გადაცემას პირდაპირი წესით, აუქციონის გარეშე ითხოვენ.
მათი თქმით, გასული ტურისტული სეზონი ჩავარდა, რის გამოც ფინანსურად დაზარალდნენ. თვითდასაქმებულები შიშობენ, რომ აუქციონისას მაღალი კონკურენციის პირობებში, შესაძლოა ისინი სამუშაო ადგილების გარეშე დარჩნენ. მცირე მეწარმეები მთავრობას გამონაკლისის დაშვებას სთხოვენ.
“ბულვარის ტერიტორიაზე წლებია საქმიანობას ვეწევით, გადასახადების კარგი გადამხდელები ვართ. რადგან გასულ წელს სხვადასხვა ფაქტორის გამო ტურისტული სეზონო ჩავარდა ძალიან დავზარალდით. ჩვენ გვსურს მთავრობა დავარწმუნოთ იმაში, რომ ტურისტების რაოდენობა მცირე იყო. ჩვენ ვითხოვთ აუდიტის მიერ შეფასებული ღირებულების გადახდა დაგვიწესონ და აუქციონები არ გამოცხადდეს,” – განაცხადა აქციაზე თვითდასაქმებულმა ჯაბა გოხიძემ.
აქციას ორგანიზებას უფლებადამცველი უწევდა. თამაზ ბაკურიძის თქმით, პროტესტამდე თვითდასაქმებულებს მთავრობასთან შეხვედრისა და მოლაპარაკების არაერთი მცდელობა ჰქონდათ, თუმცა ხელისუფლების მხრიდან სრული იგნორი იყო.
“ნუ გვემალები, გაგვესაუბრე – ხალხი ამას რომ გთხოვს ნოემბრის შემდეგ და რეაგირება არ გაქვს ეს რას უნდა ნიშნავდეს? მათთვის ყველა უწყების კარი დაკეტილია. ეს ხალხი ვინმემ კიარ მოიყვანა, არამედ ეს პროცესი ხელისუფლების უყურადღებობის შედეგია. დღევანდელი აქციით ჩანს, რომ ხელისუფლება ხალხს არ ელაპარაკება და ემალება,” – განაცხადა ჟურნალისტებთან საუბრისას თამაზ ბაკურიძემ.
ინფორმაციისთვის: ბულვარის ტერიტორიაზე თვითდასაქმებულები შეზლონგებს, ელექტრო ტრანსპორტს, ველოსიპედებსა და ატრაქციონებს აქირავებენ.
