ქობულეთის ბულვარში, თამარ მეფის სანაპიროზე, ავტომობილებით შეუზღუდავად გადაადგილდებიან. ადგილობრივებისა და დამსვენებლების თქმით, პრობლემა განსაკუთრებით ზაფხულის ტურისტულ სეზონზე მწვავდება.
მათი თქმით, სანაპირო ზოლში სხვადასხვა სიჩქარით მოძრავი ავტომობილები და ელექტრო სკუტერები საფრთხეს უქმნიან ქვეითებს, მათ შორის ბავშვებს.
გასულ წლებში სანაპიროზე ავტომობილების გადაადგილების შესაზღუდად სხვადასხვა ბარიერი იყო დამონტაჟებული, მათ შორის სპეციალური ბოძები და ბარიერები.
ადგილობრივთა ინფორმაციით, დროთა განმავლობაში, მათ შორის ზამთრის შტორმების შედეგად, ბარიერები დაზიანდა ან აღარ ფუნქციონირებს, რის გამოც ავტომობილებისთვის სანაპირო ზოლში გადაადგილება კიდევ უფრო გამარტივდა.
მოქალაქეების ნაწილი მიიჩნევს, რომ იმ მონაკვეთებზე, სადაც საცხოვრებელი სახლები და დასახლებული ტერიტორია არ არის, ავტომობილების გადაადგილება უნდა შეიზღუდოს და სანაპიროზე შესვლა მხოლოდ საგანგებო სამსახურების ავტომობილებისთვის იყოს შესაძლებელი.
ადგილობრივები პრობლემად ასევე ასახელებენ ელექტრო სკუტერებით, მათ შორის არასრულწლოვნების მიერ, სახიფათო მანევრირებას. მათი თქმით, სკუტერების ნაწილი მაღალი სიჩქარით გადაადგილდება, რაც საფრთხეს როგორც თავად მძღოლებისთვის, ისე ქვეითებისთვის ქმნის.
„აჭარა თაიმსის“ მიერ მასალაზე მუშაობის დროს სანაპირო ზოლში საპატრულო პოლიციის ეკიპაჟიც გადაადგილდებოდა. მიუხედავად იმისა, რომ ადგილზე ავტომობილებისა და ელექტრო სკუტერების გადაადგილება ხდებოდა, დარღვევებზე რეაგირება არ მომხდარა.
