ბათუმის დრამატული თეატრის მსახიობს, მეგი კობალაძეს, 6 თვით შეუჩერდა ხელფასი. ამ გადაწყვეტილებას ხელი მოაწერა თეატრის სამხატვრო ხელმძღვანელმა ნუკრი ქანთარიამ. მსახიობი ამასთან დაკავშირებით სოციალურ ქსელში განცხადებას ავრცელებს, სადაც აღნიშნავს, რომ თავად ბრძანება, რომელიც მისი ხელფასის შეჩერებას ეფუძნება, მისთვის გაუგებარია.
„6 თვით შემიჩერა ხელფასი. განმარტებაში წერს (სამხატვრო ხელმძღვანელი), რომ გახსნისთანავე არ წარვადგინე ბიულეტენი. ბატონო ნუკრი, ჩემო საყვარელოო, სანამ არ დაიხურება ბიულეტენი, არ გაძლევენ. ხო დავხურე 13 მარტს და მოგართვი?“ – წერს კობალაძე სოციალურ ქსელში.
მისი თქმით, ამ გადაწყვეტილებით კიდევ ერთხელ დასტურდება, რომ მას განსაკუთრებული მნიშვნელობა აქვს იმ ადამიანებისთვის, რომლებიც მის კრიტიკულ პოზიციას კარგად იცნობენ.
თეატრის ადმინისტრაცია, აჭარის მაუწყებელთან საუბრისას განმარტვს, რომ მსახიობის ჯანმრთელობის მდგომარეობა არ იყო ისეთი მძიმე, რომ მას ვერ შეეძლო სპექტაკლში მონაწილეობა. ისინი ასევე აღნიშნავენ, რომ კობალაძემ არ წარმოადგინა სამედიცინო ცნობა, რომელიც მისი გაფიცვის მიზეზს ამყარებდა.
ცნობისთვის: მეგი კობალაძე ხელისუფლების მიმართ კრიტიკული დამოკიდებულებით გამოირჩევა, შესაბამისად მის მიმართ ნებისმიერი გადაწყვეტილება სადამსჯელო ქმედებად აღიქმება.
