ბათუმში, ე.წ. გოროდოკის დასახლებაში ავარიული ხიდის მშენებლობა, ადგილობრივების თქმით, უკვე ორჯერ დაიწყო, თუმცა ორივე შემთხვევაში სამუშაოები მალევე შეჩერდა.
ბათუმის მერიამ სამუშაოების განახლების შესახებ საზოგადოებას ბოლოს მიმდინარე წლის აპრილში აცნობა. მერიის მიერ გავრცელებული ინფორმაციით, პროექტის დასრულების სახელშეკრულებო ვადად მიმდინარე წლის ივნისია განსაზღვრული.
თუმცა ადგილობრივები აცხადებენ, რომ ტერიტორიაზე ტექნიკა აღარ მუშაობს და სამშენებლო პროცესი ფაქტობრივად გაჩერებულია. მათი თქმით, ბოლო პერიოდში ადგილზე ბათუმის მერი გიორგი ცინცაძე იმყოფებოდა, თუმცა ამის შემდეგ სამუშაოები აღარ გაგრძელებულა.
„მოიყვანეს ტექნიკა, გადაკეტეს ხიდი, ჩადგეს კაბინები, გადაიღეს ფოტოები, შემდეგ წაიღეს კაბინები, ტექნიკაც წაიყვანეს და მორჩა. შემდეგ ისევ მოვიდნენ, ლაზერით აზომეს, ისევ გადაიღეს ფოტოები და წავიდნენ. დაგვცინიან“, – ამბობს ერთ-ერთი ადგილობრივი „აჭარა თაიმსთან“ საუბარისას.
კითხვით მივმართეთ ბათუმის მერიას, რატომ არ მიმდინარეობს ადგილზე აქტიური სამუშაოები. უწყებაში წერილობით გვიპასუხეს და ირწმუნებიან, რომ მშენებლობის პროცესი სხვა ეტაპზეა გადასული.
„ამ ეტაპზე ქარხანაში მიმდინარეობს ხიდის მალების დამზადება. მათი ტრანსპორტირება და ადგილზე მონტაჟი თვის ბოლოს დაიწყება. არსებული ხიდის დემონტაჟი ამ დრომდე არ განხორციელებულა, რადგან მოსახლეობა ფეხით გადაადგილდება ხიდზე,“ – აცხადებენ ბათუმის მერიაში.
ადგილობრივების ინფორმაციით, ჩაკეტილი ხიდის გამო დასახლებაში მუნიციპალური ტრანსპორტი აღარ მოძრაობს, ხოლო გადაადგილება შემოვლითი გზით უწევთ.
ავარიული ხიდი გასული წლის მაისში დაიკეტა. თავდაპირველი გეგმის მიხედვით, ახალი ხიდის მშენებლობა 2026 წლის თებერვალში უნდა დასრულებულიყო, თუმცა სამუშაოები ერთი წლის შემდეგაც დაუსრულებელია.
ნახეთ, ამ თემაზე „აჭარა თაიმსის“ მიერ მომზადებული მასალა არქივიდან 🔻
