ბათუმის მერიაში 12 თებერვალს გამართულ საჯარო სხდომაზე, რომელიც უსახლკაროების საკითხს ეხებოდა, მედიის წარმომადგენლის დასწრების უფლება შეიზღუდა.
გამოცემა “ბათუმელების” ჟურნალისტი, ჯაბა ანანიძე, მერიის დაცვის პოლიციამ სხდომის დარბაზში არ შეუშვა, მიუხედავად იმისა, რომ შეხვედრა საჯარო იყო და მას ბათუმის მერი, საკრებულოს თავმჯდომარე და არალეგიტიმური აჭარის უმაღლესი საბჭოს დეპუტატები ესწრებოდნენ.
ჟურნალისტი მერიის პრესცენტრისგან განმარტებას ელოდა, თუმცა კონკრეტული მიზეზი, რის გამო არ მიეცა სხდომაზე დასწრების უფლება, არ განუმარტეს. აღსანიშნავია, რომ სხდომას საზოგადოებრივი მაუწყებლის აჭარის ტელევიზია ესწრებოდა და აშუქებდა.
საქართველოს ჟურნალისტური ეთიკის ქარტიამ მომხდარი მედიის უფლებების შეზღუდვად შეაფასა და ბათუმის მერიას მოუწოდა, დაიცვას რეგლამენტით განსაზღვრული წესები.
ქარტია მიიჩნევს, რომ მერიამ და მერიის დაცვის პოლიციამ დაარღვიეს ბათუმის მუნიციპალიტეტის საკრებულოს რეგლამენტი, რომელიც საჯარო სხდომებზე მოქალაქეთა და ჟურნალისტთა თავისუფალ დასწრებას უზრუნველყოფს.
ბათუმის მუნიციპალიტეტის საკრებულოს 2014 წლის 23 სექტემბრის დადგენილების მიხედვით, ნებისმიერ პირს, მათ შორის ჟურნალისტებს, უფლება აქვთ, წინასწარი ნებართვის გარეშე დაესწრონ საკრებულოს, მისი კომისიებისა და დროებითი სამუშაო ჯგუფების სხდომებს. შესაბამისად, მერიის მიერ მიღებული გადაწყვეტილება ეწინააღმდეგება რეგლამენტით განსაზღვრულ პრინციპებს.
ჟურნალისტური ეთიკის ქარტიაში ასევე აღნიშნავენ, რომ ბათუმელების მიმართ ზეწოლას სისტემური ხასიათი აქვს და მიიჩნევენ, რომ ეს შესაძლოა უკავშირდებოდეს გამოცემის ჟურნალისტის, მზია ამაღლობელის დაკავებასა და პატიმრობას.
ორგანიზაცია აცხადებს, რომ მსგავსი ქმედებები მიზნად ისახავს მედიის საქმიანობის შეზღუდვას და მოუწოდებს ბათუმის მერიას, ჟურნალისტებს მისცეს თავისუფლად მუშაობის შესაძლებლობა.
