მოსამართლის გადაწყვეტილებით, ბათუმის ხელოვნების უნივერსიტეტის დეკანი და 4 სტუდენტი პატიმრობაში რჩებიან. ლევან ყოლბაიამ გირაოს შეთავაზება პატიმრობის სანაცვლოდ არ დააკმაყოფილა. მომდევნო სასამართლო პროცესი იანვარში გაიმართება.
“გადაწყვეტილება მოსამართლე ლევან ყოლბაიას არ მიუღია, მას მოსამართლეთა კლანმა ჩასძახა და ის გამოიტანა, არ არსებობდა არანაირი დაპატიმრების საფუძველი”,- განაცხადა პროცესის დასრულების შემდეგ ადვოკატმა დავით ჯაფარიძემ.
ადვოკატი ბათუმის საქალაქო სასამართლოს გადაწყვეტილების გასაჩივრებას გეგმავს. პროკურატურა ბრალდებულებს ჯგუფური ძალადობის ჩადენას ედავება, რაც 2 წლამდე პატიმრობას ითვალისწინებს.
“საქართველოს პროკურატურამ გაავრცელა ვიდეოკადრები, სადაც ნათლად ჩანს დაზარალებულისა და ბრალდებულების ქმედება. დაზარალებულები ყოველგვარი ძალადობის გარეშე მიდიან აღნიშნულ სასწავლებელში, სადაც ბრალდებულები თავდასხმაზე გადადიან, აღნიშნული კადრებში წუთებისა და წამების მიხედვით ნათლად ჩანს, რომელი ბრალდებული რა ქმედებას ჩადის. დაცვის მხარე პროვოკაციის მსხვერპლია”,- აცხადებს პროკურორი პაატა ცეცხლაძე.
გარემოება: პროფესორი, მამუკა ჯორბენაძე გაფიცვის ორგანიზებაში მონაწილეობდა, რის გამოც სტუდენტები და ლექტორები ფიქრობენ, რომ მისი დაკავება პოლიტიკურად მოტივირებულია.
ინფორმაციისთვის: ინციდენტი სასწავლებლის შენობაში მოხდა. დაწესებულებაში ერთ-ერთი ლექტორის, თეა ცაგურიას ქმარი შეიჭრა და დეკანს ჯერ სიტყვიერად დაუპირისპირდა, რაც მოგვიანებით ფიზიკურ ძალადობაში გადაიზარდა. ირაკლი დევაძე ბათუმის მერიის მაღალჩინოსანია. ფაქტი უნივერსიტეტის სათვალთვალო კამერებმა ასახა, კადრები უკანონოდ თეა ცაგურიას ქმარმა მოიპოვა და სოციალურ ქსელში ატვირთა. კადრები კონტექსტისა და ხმის გარეშე პროპაგანდისტულმა მედიებმა გაავრცელეს.
ინციდენტამდე როგორც სტუდენტები ყვებიან მამუკა ჯორბენაძესა და თეა ცაგურიას შორის სიტყვიერ შელაპარაკებას ჰქონდა ადგილი. კერძოდ, ცაგურია სტუდენტებს ცინიკურად მიმართავდა და გაფიცულებს ნაცებს, ასევე, მოძალადეებს ეძახდა. ამ გარემოებამ კი, ჯორბენაძის გაღიზიანება გამოიწვია.
ცნობისთვის: დაკავებულები არიან: 1978 წელს დაბადებული მ.ჯ., 2004 წელს დაბადებული გ.მ., 2003 წელს დაბადებული დ.გ., 2002 წელს დაბადებული გ.დ. და 2004 წელს დაბადებული ა.კ.
