ბათუმში, დამამძიმებელ გარემოებაში მომხდარი განზრახ მკვლელობის მცდელობის საქმეზე ერთ ბრალდებულს წინასწარი პატიმრობა ცოტა ხნის წინ შეუფარდეს. პოლიცია ეძებს დანაშაულში ფიგურანტ კიდევ ორ პირს. საქმის მასალების მიხედვით, ახალგაზრდა კაცს 19-მდე ჭრილობა აქვს მიყენებული და ის ამ ეტაპზე საავადმყოფოშია მოთავსებული. შემთხვევა “ოცნების ქალაქის” მიმდებარედ 17 ივნისს მოხდა.
პროკურორმა სასამართლო სხდომაზე განაცხადა, რომ არსებობს მიმალვის მცდელობა, რის გამოც ბრალდებულის პატიმრობაში დატოვება მოითხოვა. თორნიკე გოგეშვილის ინფორმაციით, დაჭრის შემთხვევას წარსულში მხარეებს შორის დაპირისპირება უძღვოდა. კერძოდ, წლების წინ მომხდარ მკვლელობის ერთ-ერთ ეპიზოდზე მხარეებს შორის იყო უთანხმოება.
ბრალდებულ ზვიად მახარაძის ინტერესების დამცველის მტკიცებით, მისი დაცვის ქვეშ მყოფი პირი უდანაშაულოა და ამას საქმის არსებითი განხილვისას დაამტკიცებს. ადვოკატმა თავისუფლების სანაცვლოდ 10 ათასლარიანი გირაოს შუამდგომლობა დააყენა, რასაც მოსამართლე არ დაეთანხმა.
ცნობისთვის, აღნიშნულ საქმეზე პოლიციამ, დანაშაულის შეუტყობინებლობის ბრალდებით ერთი პირი დააკავა, თუმცა დღეს სასამართლო პროცესზე გაირკვა, რომ რეზო გეგიძე დანაშაულის ჩადენისას შემთხვევის ადგილზე არ იმყოფებოდა და ბრალდება, რომელიც პოლიციელების ჩვენებას ეყრდნობოდა სიმართლეს არ შეესაბამებოდა. გეგიძე სასამართლო დარბაზიდა გაათავისუფლეს.
