დანაშაულის შეუტყობინებლობის ბრალდებით დაკავებული ახალგაზრდა სასამართლო დარბაზიდან დღეს გათავისუფლდა. პროცესზე გაირკვა, რომ რეზო გეგიძე დანაშაულის ჩადენისას შემთხვევის ადგილზე არ იმყოფებოდა.
პროკურატურა თავდაპირველად ორი ცრუ პოლიციელის ჩვენებას დაეყრდნო, მოგვიანებით კი ბრალდების შესაბამისი მტკიცებულებები უწყებამ სასამართლოში ვერ წარადგინა.
ახალგაზრდა ბიჭის ოჯახის წევრების თქმით, დანაშაულის ჩადენის დროს რეზო სამედიცინო დაწესებულებაში იმყოფებოდა, რაც შესაბამისი ვიდეო ჩანაწერებითა და სამედიცინო ცნობებით დადაასტურეს.
რეზო გეგიძემ წინაწარი მოთავსების იზოლატორში სამი დღე გაატარა, პროკურატურამ კი, დღეს, სასამართლოს მისი გათავისუფლება არარსებული მტკიცებულებების გამო მოსთხოვა.
ინფორმაციისთვის: საქმე 17 ივნისს, “ოცნების ქალაქის” მიმდებარედ მომხდარ განზრახ მკვლელობის მცდელობის ფაქტს ეხება. საქმის მასალების მიხედვით, ახალგაზრდა კაცს 19-მდე ჭრილობა აქვს მიყენებული და ის ამ ეტაპზე საავადმყოფოშია მოთავსებული.
გამოძიების ცნობით, დანაშაულის ჩამდენი კიდევ ორი პირია, თუმცა ისინი ამ ეტაპზე არ დაუკავებიათ.
ბრალდებულ ზვიად მახარაძის ინტერესების დამცველის მტკიცებით, მისი დაცვის ქვეშ მყოფი პირი უდანაშაულოა და ამას საქმის არსებითი განხილვისას დაამტკიცებს. ადვოკატმა თავისუფლების სანაცვლოდ 10 ათასლარიანი გირაოს შუამდგომლობა დააყენა, რასაც მოსამართლე არ დაეთანხმა.
პროკურორმა სასამართლო სხდომაზე განაცხადა, რომ არსებობს მიმალვის საფრთხე, რის გამოც ბრალდებულის პატიმრობაში დატოვება მოითხოვა. თორნიკე გოგეშვილის ინფორმაციით, დაჭრის შემთხვევას წარსულში მხარეებს შორის დაპირისპირება უძღვოდა. კერძოდ, წლების წინ მომხდარ მკვლელობის ერთ-ერთ ეპიზოდზე მხარეებს შორის იყო უთანხმოება.
