შინაგან საქმეთა სამინისტროს ინფორმაციით, საქართველოს სამართალდამცავებმა ინტერპოლის წითელი ცირკულარით ძებნილი თურქეთის მოქალაქეები – 1998 წელს დაბადებული მ.თ., 1993 წელს დაბადებული ო.უ. და 1975 წელს დაბადებული ი.ქ. – ბათუმში, სხვადასხვა დროს, დააკავეს.
მათ მიმართ ძებნა თურქეთის რესპუბლიკის სამართალდამცავი ორგანოების მიერ იყო გამოცხადებული:
- მ.თ. – განზრახ მკვლელობის,
- ო.უ. – ძარცვისა და თავისუფლების უკანონო აღკვეთის,
- ი.ქ. – ნარკოტიკების ან მასტიმულირებელი ნივთიერებების კომერციალიზაციის/გაყიდვის ან მიწოდების ბრალდებით.
შსს-ს ცნობით, დაკავებულებმა საქართველოს საზღვარი ჯერ კიდევ იმ პერიოდში გადმოკვეთეს, ვიდრე მათ მიმართ საერთაშორისო ძებნა გამოცხადდებოდა.
სამივე პირი პოლიციამ ბათუმში ჩატარებული ოპერატიულ-საგამოძიებო ღონისძიებების შედეგად დააკავა. ამ დროისთვის, მათ მიმართ მიმდინარეობს კანონით გათვალისწინებული საექსტრადიციო პროცედურები.
