შინაგან საქმეთა სამინისტროს ინფორმაციით, აჭარის პოლიციის დეპარტამენტის თანამშრომლებმა, თურქეთის რესპუბლიკის სამართალდამცავ ორგანოებთან ერთობლივად, ცხელ კვალზე ჩატარებული ოპერატიულ-სამძებრო ღონისძიებების შედეგად, 1990 წელს დაბადებული, წარსულში არაერთი დანაშაულისთვის ნასამართლევი ი.მ. დააკავეს.
გამოძიების მიხედვით, ბრალდებულმა ბათუმში, ყოფით ნიადაგზე დაწყებული კონფლიქტისას, ცეცხლსასროლი იარაღიდან გასროლით 1981 წელს დაბადებული ა.ა. ქვედა კიდურში დაჭრა, რის შემდეგაც შემთხვევის ადგილიდან სარფის სასაზღვრო გამშვები პუნქტის მიმართულებით ქვეყნიდან გასაქცევად გაემართა.
დაჭრილი კაცი საავადმყოფოში გადაიყვანეს, სადაც შესაბამისი სამედიცინო დახმარება ჩაუტარდა. ექიმების ცნობით, მის სიცოცხლეს საფრთხე არ ემუქრება. ი.მ. ცხელ კვალზე, თურქ კოლეგებთან თანამშრომლობით, დააკავეს.
მომხდარზე გამოძიება საქართველოს სისხლის სამართლის კოდექსის 120-ე მუხლით (ჯანმრთელობის განზრახ მსუბუქი დაზიანება) და 236-ე მუხლით (ცეცხლსასროლი იარაღის მართლსაწინააღმდეგო შეძენა, შენახვა და ტარება) მიმდინარეობს. დანაშაული 7 წლამდე ვადით თავისუფლების აღკვეთას ითვალისწინებს.
