შინაგან საქმეთა სამინისტროს აჭარის პოლიციის დეპარტამენტის ბათუმის საქალაქო სამმართველოს თანამშრომლებმა, ჩატარებული ოპერატიული და საგამოძიებო მოქმედებების შედეგად, თაღლითობის ბრალდებით ორი პირი – 1988 წელს დაბადებული გ.ზ. და 2000 წელს დაბადებული ბ.ხ. – დააკავეს. ორივე მათგანი წარსულში ნასამართლევია.
შსს-ს ცნობით, გამოძიებით დადგინდა, რომ ბრალდებული გ.ზ. მოტყუებით დაეუფლა მოქალაქე ე.ჯ.-ს ორ ავტომობილს. მან დაზარალებულს დაჰპირდა, რომ მანქანების საფასურს ნაწილ-ნაწილ გადაუხდიდა, თუმცა შეთანხმება არ შეასრულა, რის შედეგადაც ე.ჯ.-ს 30 167 ლარის ზიანი მიადგა.
გამოძიების მიხედვით, გ.ზ.-მ თაღლითურად კიდევ ერთი მოქალაქის თანხასაც დაეუფლა. რაც შეეხება მეორე დაკავებულს, ბ.ხ.-ს, იგი ბრალდებულია ერთ-ერთი საწარმოდან დაახლოებით 50 000 ლარამდე ღირებულების ხორცპროდუქტების თაღლითურად დაუფლებაში.
თაღლითობის ფაქტებზე გამოძიება სისხლის სამართლის კოდექსის 180-ე მუხლით მიმდინარეობს, რაც 9 წლამდე ვადით თავისუფლების აღკვეთას ითვალისწინებს.
