შინაგან საქმეთა სამინისტროს ინფორმაციით, გენერალური ინსპექციის თანამშრომლებმა, გენერალურ პროკურატურასთან ერთად ჩატარებული საგამოძიებო მოქმედებების შედეგად, ქრთამის აღების ბრალდებით 1975 წელს დაბადებული რ.დ. დააკავეს.
შსს-ს ცნობით, გამოძიებით დადგინდა, რომ აჭარის პოლიციის დეპარტამენტის ბათუმის საქალაქო სამმართველოს თანამშრომელმა რ.დ.-მ სამინისტროს საინფორმაციო ბაზაში საქართველოსა და უცხო ქვეყნის მოქალაქეების შესახებ არსებული პერსონალური მონაცემები უკანონოდ გადაამოწმა და აღნიშნული ინფორმაცია მოქალაქე რ.კ.-ს გადაუგზავნა.
სამინისტროს განცხადებით, აღნიშნული ქმედების სანაცვლოდ, პოლიციელმა ქრთამის სახით ჯამში 1000 აშშ დოლარი მიიღო.
დაკავებისას რ.დ.-მ გენერალური ინსპექციის თანამშრომლების დანახვაზე ავტომანქანით მიმალვა სცადა, რა დროსაც მოხდა შეჯახება. შემდგომ მან ავტომობილი მიატოვა და ფეხით გაქცევა მოისურვა, თუმცა პოლიცირლებმა ადგილზე დააკავეს.
მოძრაობისას ჩატარებული პირადი ჩხრეკის შედეგად, სამართალდამცველებმა ნივთმტკიცების სახით ამოიღეს თანხის ნაწილი — 500 აშშ დოლარი.
საქმეზე გამოძიება საქართველოს სისხლის სამართლის კოდექსის 338-ე მუხლის პირველი ნაწილის მიხედვით მიმდინარეობს, რაც ქრთამის აღებას გულისხმობს. დანაშაული 9 წლამდე თავისუფლების აღკვეთას ითვალისწინებს.
