გუშინ, 26 მაისს, ბათუმში გამართული საკალათბურთო მატჩის დროს ქომაგებს შორის სიტყვიერი და ფიზიკური დაპირისპირება მოხდა.
თვითმხილველების ინფორმაციით, კონფლიქტში ბათუმის მერიის თანამშრომლებიც მონაწილეობდნენ.
როგორც თვითმხილველები ამბობენ, დაპირისპირების დროს ფიზიკურად გაუსწორდნენ ბათუმის ავტოტრანსპორტის დირექტორის მოადგილეს, რიჩარდ სირაბიძეს.
ბათუმის ავტოტრანსპორტის დირექტორი ინციდენტში ჩართული პირების გაშველებას ცდილობდა. სულხან დუმბაძემ „აჭარა თაიმსთან“ საუბრისას განაცხადა, რომ მისი მიზანი ვითარების განმუხტვა იყო.
„მე ადამიანებს დამშვიდებისკენ მოვუწოდებდი. ადამიანური ამბავია, ვაშველებდი. არაფერი ისეთი არ მომხდარა, რომ ამაზე განსაკუთრებული კომენტარი გავაკეთო,“ – განაცხადა სულხან დუმბაძემ ჩვენთან საუბრისას.
ბათუმის ავტოტრანსპორტის დირექტორი უარყოფს ინფორმაციას, თითქოს მის მოადგილეზე ფიზიკურად იძალადეს.
„მე მსგავსი არაფერი მინახავს,“ – ამბობს დუმბაძე.
კონფლიქტში მონაწილეობასა და მასზე ფიზიკური ანგარიშსწორების ფაქტს კატეგორიულად უარყოფს რიჩარდ სირაბიძე. „აჭარა თაიმსთან“ საუბრისას მან დაადასტურა, რომ ინციდენტი მართლაც მოხდა, თუმცა ირწმუნება, რომ თავად პროცესში არ მონაწილეობდა.
რიჩარდ სირაბიძემ და სულხან დუმბაძემ ჩვენთან არ ისაუბრეს იმ მიზეზებზე, რამაც დაპირისპირება გამოიწვია.
„აჭარა თაიმსი“ დამატებითი ინფორმაციის მიღების მიზნით შინაგან საქმეთა სამინისტროს დაუკავშირდა. პასუხის მიღების შემთხვევაში მასალა განახლდება.
