ბათუმში სხვადასხვა ტაქსის კომპანიის მძღოლებმა საპროტესტო აქცია გამართეს და პროტესტის ნიშნად რამდენიმე საათით მუშაობა შეწყვიტეს. მათი მთავარი მოთხოვნა დამსაქმებლების მიერ დაწესებული ტარიფებისა და მაღალი საკომისიოების გადახედვაა.
მძღოლების თქმით, არსებული პირობებით მიღებული შემოსავალი არასაკმარისია, განსაკუთრებით გაზრდილი საწვავის ფასების ფონზე. ისინი აცხადებენ, რომ თუ მგზავრობის ტარიფი არ გაიზრდება და საკომისიო არ შემცირდება, მუშაობა მათთვის ეკონომიკურად არარენტაბელური ხდება.
აქციის მონაწილეები პროცესში მთავრობის ჩართულობასაც ითხოვენ. მათი შეფასებით, პრობლემის გადაწყვეტა მძღოლების ინტერესების გათვალისწინების გარეშე შეუძლებელია.
„ჩემზე მეტი მიაქვს დამსაქმებელს. აქ ვინც დგას, თითქმის ყველა ოჯახი მინიმუმ სამი წევრისგან შედგება. წარმოიდგინეთ, რამდენი ადამიანი ელოდება საღამოს ჩვენს მიერ გამომუშავებულ ფულს, მაგრამ ვერ ვახერხებთ – დღეს აქ ვდგავართ. თუმცა, რომც არ ვიდგეთ, მაინც არაფერი დაგვრჩება. აქციაზე პირდაპირ საავადმყოფოდან მოვედი. დღეში 12-14 საათს ვმუშაობთ და ბოლოს შეიძლება ბავშვისთვის კანფეტის ფულიც არ გვქონდეს. კომპანიას საერთოდ არ ადარდებს ჩვენი მდგომარეობა. ახლა მანქანაზე რეკლამას ვხსნი – უკვე მეზიზღება, მანქანის დანახვაც აღარ მინდა. დილით გაღვიძებაც არ მინდა იმ აზრით, რომ მოჯამაგირე ვარ. მთელი დღე ვმუშაობ, შშმ პირი ვარ და არ ვიცი, შევძლებ თუ არა ოჯახის შენახვას,“ – განაცხადა ერთ-ერთმა მძღოლმა ჩვენთან საუბარში.
პროტესტის ერთ-ერთ მიზეზად დასახელდა არათანაბარი კონკურენციაც. მძღოლები ამბობენ, რომ კანონმდებლობის გამკაცრების მიუხედავად, ტაქსის სფეროში კვლავ მუშაობენ უცხო ქვეყნის მოქალაქეები, რომლებიც, მათი ინფორმაციით, აპლიკაციებში სხვისი ქართული პირადობის გამოყენებით რეგისტრირდებიან და რეგულაციებს გვერდს უვლიან.
მძღოლების მოთხოვნებს ამ ეტაპზე ტაქსის კომპანიები არ გამოხმაურებიან, რის გამოც უცნობია, რა გადაწყვეტილებებს მიიღებენ ისინი უახლოეს პერიოდში.
