საქართველოს სახელმწიფო უსაფრთხოების სამსახურის ინფორმაციით, ერთობლივად ჩატარებული სპეციალური ღონისძიების ფარგლებში, ბათუმში ორი პირი დააკავეს. მათ შორის ერთი უცხო ქვეყნის, ხოლო მეორე საქართველოს მოქალაქეა.
სუს-ის ცნობით, აღნიშნული პირების შესახებ უწყებას წინასწარ ჰქონდა ინფორმაცია, მათ შორის საქართველოში შემოსვლისა და მიზნების შესახებ. ისინი ქვეყანაში სხვადასხვა დროს ჩამოვიდნენ და ბათუმში ნაქირავებ ბინაში დაბინავდნენ. შემოსვლის დღიდანვე ორივე პირი კონტრტერორისტული ცენტრის ოპერატიული კონტროლის ქვეშ იმყოფებოდა, რაც სასამართლოს განჩინებების საფუძველზე ხორციელდებოდა.
გამოძიებით დადგენილია, რომ დაკავებულები ტერორისტულ ორგანიზაცია „ისლამური სახელმწიფოს“ რიგებში იყვნენ გაწევრიანებული. სუს-ის ინფორმაციით, მათ დადეს ერთგულების ფიცი (ე.წ. ბაიათი), რაც ვიდეოფაილის სახით დააფიქსირეს და ორგანიზაციის ლიდერებს გადაუგზავნეს, რითაც მათ მიმართ უპირობო მორჩილება გამოხატეს. ასევე ირკვევა, რომ ისინი გეგმავდნენ საქართველოს დატოვებას და სხვა ქვეყანაში გამგზავრებას, სადაც ორგანიზაციის მებრძოლებს უნდა შეერთებოდნენ.
საგამოძიებო მოქმედებების შედეგად ამოღებულია ელექტრონული ინფორმაციის მატარებელი მოწყობილობები, დაურეგისტრირებელი სიმბარათები, მობილური ტელეფონები, ტერორისტული ორგანიზაციის სიმბოლიკის ამსახველი ნივთები, ნიღბები, პირადი დოკუმენტები და საქმისათვის მნიშვნელოვანი სხვა მტკიცებულებები.
საქმეზე გამოძიება მიმდინარეობს საქართველოს სისხლის სამართლის კოდექსის 328-ე მუხლით, რაც უცხო ქვეყნის ტერორისტულ ორგანიზაციაში გაერთიანებასა და ტერორისტულ საქმიანობაში დახმარებას გულისხმობს. აღნიშნული დანაშაული 10-დან 17 წლამდე თავისუფლების აღკვეთას ითვალისწინებს.
