გარემოს ეროვნული სააგენტოს ინფორმაციით, 19 სექტემბრის განმავლობაში და 20 სექტემბრის დილამდე აჭარის სანაპირო ზოლსა და მიმდებარე ტერიტორიებზე ძლიერი ინტენსივობის ნალექი დაფიქსირდა. ძლიერმა წვიმამ ბათუმის ცალკეულ უბნებში ქუჩების დატბორვა და ურბანული ინფრასტრუქტურის დროებითი გადატვირთვა გამოიწვია.
სააგენტოს მეტეოროლოგიური დაკვირვებების მიხედვით, ნალექების ყველაზე მაღალი მაჩვენებელი ბათუმში დაფიქსირდა. ქალაქში 21 საათის განმავლობაში უწყვეტად წვიმდა, ხოლო 19-20 სექტემბერს მოსული ნალექის ჯამურმა რაოდენობამ 275 მმ შეადგინა, რაც სექტემბრის თვის კლიმატური ნორმის 90%-ზე მეტია.
ამასთან, მხოლოდ ერთ საათში, 19 სექტემბრის 21:00-დან 22:00 საათამდე, 52.5 მმ ნალექი მოვიდა, რაც 24-საათიანი რაოდენობის დაახლოებით 20%-ია.
გარემოს ეროვნული სააგენტოს განცხადებით, ისტორიულ მონაცემებთან შედარებით, ბათუმის სადგურზე 24 საათში მოსული 273 მმ ნალექი სექტემბრისთვის უპრეცედენტოა და 100-წლიანი განმეორებადობის ნალექს განეკუთვნება.
19-20 სექტემბერს ნალექის რაოდენობამ:
- ქობულეთში – 134.5 მმ;
- კოხში (ქობულეთი) – 58.5 მმ;
- მტირალას ეროვნულ პარკში – 93 მმ;
- სინდიეთში (ხელვაჩაური) – 50.8 მმ;
შეადგინა.
გარემოს ეროვნული სააგენტო აცხადებს, რომ ჰიდრომეტეოროლოგიური პირობების უწყვეტ მონიტორინგს აგრძელებს.
