უცხოეთში, გასტროლზე წასული ანსამბლის 9 წევრი მიუნხენის აეროპორტში ჩარჩა, ამის შესახებ ინფორმაცია “აჭარა თაიმსს” თეა წიკლაურმა მიაწოდა. სტუდია “ვარსკვლავების” ხელმძღვანელის თქმით, ფრენა გაუქმდა და ისინი ამ წუთებში აეროპორტში იმყოფებიან, საიდანაც ნეაპოლში გამგზავრებას აპირებდნენ.
“ჯავშნები ისე შეიცვალა, ფაქტობრივად ჩვენი გასტროლი უშედეგო იქნება. მსოფლიო ჩემპიონატში მონაწილეობას ვერ შევძლებთ. 6 საათი ვიდექით სერვისცენტრის რიგში, სადაც ყველანაირ ცვლილებაზე უარი გვითხრეს, მოგვიანებით კი მიუნხენი-რომის ბილეთები მოგვცეს. ფრენა ხვალ შუადღით შესრულდება, მანამდე კი აეროპორტში გვიწევს ღამისთევა. ეს ფრენაც შესაძლოა გაუქმდეს, რადგან 100 პროცენტიანი გარანტია ვერ მოგვცეს,” – გვითხრა თეა წიკლაურმა.
თეა წიკლაურის თქმით, ევროპის მიმართულებით რამდენიმე ფრენა გაუქმდა და მგზავრებს ღამისთევა აეროპორტში უწევთ, მიზეზი სავარაუდოდ უამინდობაა.
შესწორება: მასალის გამოქვეყნების შემდეგ თეა წიკლაური დაგვიკავშირდა და გვითხრა, რომ მიუნხენი-რომის ფრენაც გაუქმდა.
