ერაყის რესპუბლიკის წყლების მიმდებარედ ტანკერზე მომხდარი ინციდენტის შემდეგ, რომელშიც სავარაუდოდ დრონი იყო გამოყენებული, გემზე მყოფი ქართველი მეზღვაურები უსაფრთხოდ არიან. ინფორმაციას საქართველოს საზღვაო ტრანსპორტის სააგენტო ავრცელებს.
სააგენტოს ცნობით, ინციდენტი 11 მარტს მოხდა. თავდასხმა სავარაუდოდ უპილოტო საფრენი აპარატის გამოყენებით განხორციელდა, თუმცა მომხდარის დეტალები ჯერ კიდევ ზუსტდება.
როგორც უწყებაში აცხადებენ, საკრუინგო კომპანიისგან მიღებული ინფორმაციის მიხედვით, გემზე მყოფი საქართველოს მოქალაქე მეზღვაურები ამ დროისთვის უსაფრთხოდ იმყოფებიან. პარალელურად, უკვე დაწყებულია მათი სამშობლოში დაბრუნების პროცედურები.
„გემთმფლობელი კომპანია და სადაზღვევო კომპანია ჩართულნი არიან პროცესში და მიმდინარეობს მეზღვაურთა რეპატრიაციის პროცესის ორგანიზება“, – ნათქვამია სააგენტოს მიერ გავრცელებულ განცხადებაში.
უწყების ინფორმაციით, საქართველოს საზღვაო ტრანსპორტის სააგენტო ქვეყნის სხვა პროფილურ სახელმწიფო უწყებებთან ერთად მუდმივ კომუნიკაციაშია გემთმფლობელ კომპანიასთან. საჭიროების შემთხვევაში, მათი თქმით, მიიღება ყველა შესაბამისი ზომა ქართველი მეზღვაურების ინტერესების დასაცავად.
სააგენტოში ასევე განმარტავენ, რომ ახლო აღმოსავლეთის საზღვაო რეგიონში უსაფრთხოების გარემოს მუდმივად აკვირდებიან საერთაშორისო სტრუქტურები, მათ შორის International Maritime Organization (IMO).
