„თამბაქოს კონტროლის ალიანსის“ განცხადებით, მიუხედავად იმისა, რომ საქართველომ თამბაქოს მოხმარების შემცირების კუთხით გარკვეულ პროგრესს მიაღწია, არსებული ვითარება კვლავ სერიოზულ გამოწვევად რჩება. 2025 წლის თამბაქოს მოხმარების გლობალური ზრდასრულთა კვლევის თანახმად, ბოლო ათწლეულში თამბაქოს მოხმარება 33%-დან 24%-მდე შემცირდა, თუმცა ეს მაჩვენებელი კვლავ მნიშვნელოვნად აღემატება ევროპულ საშუალო დონეს.
ალიანსის შეფასებით, განსაკუთრებულ საფრთხეს წარმოადგენს ბოლო სამი წლის განმავლობაში ელექტრონული სიგარეტებისა და გასახურებელი თამბაქოს მოხმარების მკვეთრი ზრდა. ორგანიზაცია აღნიშნავს, რომ ეს ტენდენცია ეწინააღმდეგება საქართველოს სტრატეგიულ მიზანს – 2040 წლისთვის გახდეს „თამბაქოსგან თავისუფალი ქვეყანა“, რაც მოსახლეობაში თამბაქოსა და ნიკოტინის ყველა ფორმის მოხმარების 5%-ზე ქვემოთ დაყვანას გულისხმობს.
განცხადებაში ხაზგასმულია, რომ თამბაქოსგან მიყენებული ზიანი ათჯერ აღემატება ინდუსტრიის მიერ სახელმწიფო ბიუჯეტში შეტანილ გადასახადებს და სერიოზულ ფინანსურ და დემოგრაფიულ ტვირთს ქმნის. ამ ფონზე, „თამბაქოს კონტროლის ალიანსი“ ხელისუფლებას სთავაზობს კონკრეტულ ნაბიჯებს, მათ შორის: ყველა სახის თამბაქოს ნაწარმისა და ნედლეულის თანაბარ დაბეგვრას, თამბაქოს უკანონო ვაჭრობის აღმოფხვრის ოქმთან შეერთებას, არომატების აკრძალვას, თამბაქოს შეძენის ასაკის 21 წლამდე გაზრდას და მოწევის სრულ აკრძალვას კაზინოებსა და თეატრების სცენებზე.
ასევე, ორგანიზაცია მოითხოვს დახურულ სივრცეებში მოწევის წესების დარღვევაზე ჯარიმების ზრდას, სკოლებსა და ბაღებთან ახლოს რეალიზაციაზე კონტროლის გამკაცრებას, თამბაქოს ინდუსტრიასთან ურთიერთობის გამჭვირვალობის უზრუნველყოფას და თამბაქოს კონტროლის პროგრამების დაფინანსების აღდგენას.
„თამბაქოს კონტროლის ალიანსის“ ინფორმაციით, 2025 წლის კვლევის მიხედვით, აღნიშნულ ცვლილებებს მოსახლეობის 75% უჭერს მხარს. ორგანიზაციის შეფასებით, ეს წარმოადგენს მკაფიო საზოგადოებრივ დაკვეთას და ხელისუფლების რეალური ნება მომავალ თაობებზე ზრუნვისთვის სწორედ ქმედითი ნაბიჯების გადადგმაში უნდა აისახოს.
