სამოქალაქო აქტივისტი და პარტია “თავისუფალი მოედნის” წევრი ახალი ფონდის შექმნას აანონსებს, რომელიც, დავით ჯინჭარაძის თქმით, ხელისუფლების მხრიდან ანგარიშების დაყადაღებისა და რეპრესიების საპასუხო ნაბიჯია.
სოციალური ქსელით გავრცელებულ განცხადებაში ჯინჭარაძე საუბრობს დეცენტრალიზებული, უცხოურ ანგარიშებზე დაფუძნებული სისტემის აუცილებლობაზე, რომელიც ქართული სამართლებრივი ზეწოლისგან დაცული იქნება.
„თავისუფლების ფონდი“ ემიგრანტებისა და უცხოეთში მცხოვრები მოქალაქეების დონაციებს დაეყრდნობა და მათ ჯარიმების გადახდაში დაეხმარება. აქტივისტის თქმით, ფონდი გამჭვირვალე მექანიზმებით იმუშავებს და ის საკუთარი მენეჯერული გამოცდილების გამოყენებას აპირებს.
“ცხადია, საქართველოში რეგისტრირებული ფონდების დაყადაღება და სახლში მივარდნები ნიშნავს, რომ უფრო უნდა გავაქტიურდეთ და ყველამ საკუთარი შესაძლებლობის მაქსიმუმი დავდოთ ივანიშვილის გადასაგდებად. ამიტომ მგონია, რომ საჭიროა რამდენიმე დეცენტრალიზებული ფონდი, რომელიც უცხოური ანგარიშებით და ონლაინ გადახდის სისტემებით იმუშავებს და რომლის დაყადაღებაც შეუძლებელი იქნება.
დღეს ვქმნი ,,თავისუფლების ფონდს”, რომელიც ღიაა დონაციებისთვის, განსაკუთრებით კი ემიგრანტების და საზღვარგარეთ მყოფი მოქალაქეების მხრიდან. თანხების შეგროვებისთანვე, ფონდი მოქალაქეებს დაეხმარება გასაჩივრებული ჯარიმების გადახდაში. ამ ფონდს ვერ დააყადაღებენ, რადგან ბანკის ანგარიში ინგლისში იქნება. შემდეგი დღეების განმავლობაში ვიმუშავებ სანდო მოხალისეთა ჯგუფის შემოსაკრებად, თანხმების მობილიზებისთვის და ონლაინ სისტემის შემუშავებისთვის, რომელიც ყველა ხარჯის და დონაციის გამჭირვალედ აღრიცხვაში დაგვეხმარება. გამოვიყენებ ჩემს მართვით გამოცდილებას, რომელიც ბრიტანულ და ამერიკულ კომპანიებში მუშაობისას შევიძინე. ღია ვარ ნებისმიერი დახმარებისთვის და კოლაბორაციისთვის. ცეცხლი ოლიგარქიას,” – წერს დავით ჯინჭარაძე სოციალურ ქსელში.
