„საქართველოს კონკურენციისა და მომხმარებლის დაცვის სააგენტოს“ ინფორმაციით, შპს „ისურვეს“ უსამართლო კომერციული საქმიანობის განხორციელება დაუდგინა. გადაწყვეტილება 78 მომხმარებლის განცხადების საფუძველზე მიიღეს.
საქმის შესწავლის შედეგად გაირკვა, რომ კომპანია სისტემატურად არღვევდა შეკვეთილი პროდუქციის მიწოდების ვადებს. ასევე, მომხმარებლები მიუთითებდნენ, რომ შეკვეთის გაუქმების შემთხვევაში თანხის დაბრუნება მნიშვნელოვნად იგვიანებდა. დარღვევები გამოვლინდა იმ შემთხვევებშიც, როდესაც ხელშეკრულებით განსაზღვრული პირობები მიწოდების ნაწილში არ სრულდებოდა.
სააგენტოს შეფასებით, აღნიშნული პრაქტიკა წარმოადგენს შეცდომაში შემყვან კომერციულ საქმიანობას, რაც არღვევს სამართლიანი ვაჭრობის პრინციპებს და აზიანებს მომხმარებელთა ინტერესებს. გადაწყვეტილების თანახმად, შეკვეთის გაუქმების შემდეგ მომხმარებლისთვის თანხის დაბრუნების მაქსიმალური ვადა 14 კალენდარული დღით განისაზღვრა. ამ ვადის გადაცილება არაგონივრულად ჩაითვლება.
სააგენტომ კომპანიას დაავალა, ერთთვიან ვადაში აღმოფხვრას დარღვევები, სრულად აღადგინოს მომხმარებელთა უფლებები და საკუთარი სავაჭრო პოლიტიკა კანონთან შესაბამისობაში მოიყვანოს.
კანონის მიხედვით, გადაწყვეტილების შეუსრულებლობის ან არასათანადოდ შესრულების შემთხვევაში, კომპანიას დაეკისრება ჯარიმა, რომელიც შეიძლება წინა წლის ბრუნვის 2%-მდე იყოს. დარღვევის განმეორება კი 12 თვის განმავლობაში ჯარიმის გაორმაგებას გამოიწვევს.
