დილიდან ბათუმში, იუსტიციის სახლში მშვიდობიანი საპროტესტო აქცია მიმდინარეობს. სხვადასხვა პოლიტიკური პარტიის წარმომადგენლები და მათი მხარდამჭერები ადგილზე მივიდნენ, რიგის ნომრები აიღეს და ოპერატორებს გაფიცვის, ასევე, პროტესტის მნიშვნელობაზე ესაუბრებოდნენ.
აქციაში მონაწილე პირების თქმით, იუსტიციის სახლის თანამშრომლები მათ საუბარს ურეაქციოდ პასუხობნდნენ, ასევე, იქმნებოდა შთაბეჭდილება, რომ დასაქმებულები დისკომფორტში იყვნენ.
შიდა ტერიტორიაზე დაცვის პოლიცია, ხოლო გარე პერიმეტრზე შინაგან საქმეთა სამინისტროს წარმომადგენლები იყვნენ მობილიზებული. მედიას იუსტიციის სახლში გადაღების შესაძლებლობა არ მიეცა, დაცვის პოლიციის წარმომადგენლები განსაკუთრებული აგრესიით გამოირჩეოდნენ.
„შემოვედით, ხმამაღლა გაფიცვისკენ მოვუწოდეთ იუსტიციის სახლის თანამშრომლებს. შემოვარდა პოლიცია, მათ შორის შენობაში წინასწარ მობილიზებული ჰყავდათ დაცვის პოლიცია და ძალის გამოყენებით, იძულებით გამოგვიყვანეს გარეთ. როცა ქვეყანაში კანონი არ კანონობს და არაფრის პროტესტს კანონის ფარგლებში აზრი არ აქვს, ჩვენ ერთადერთი პროტესტი ხმაურით და ფიზიკურად შეგვიძლია რომ გამოვხატოთ. ამიტომ, ყოველთვის ვდგავართ იქ, სადაც სჭირდება ჩვენს ქვეყანას და აუცილებლად ეს ბრძოლა მივა გამარჯვებამდე, – განაცხადა „ერთიანი ნაციონალური მოძრაობის“ წევრმა ბონდო თედორაძემ.
