შინაგან საქმეთა სამინისტროს გენერალური ინსპექციის თანამშრომლებმა ჩატარებული საგამოძიებო და ოპერატიული ღონისძიებების შედეგად, სამსახურებრივი უფლებამოსილების ბოროტად გამოყენების ფაქტზე ერთ პირს ბრალი წარუდგინეს, ხოლო სამი თანამშრომელი შესაბამისი დასკვნის საფუძველზე სამსახურიდან დაითხოვეს.
გამოძიების ინფორმაციით, შსს-ს მომსახურების სააგენტოს თანამშრომელმა -1977 წელს დაბადებულმა დ.ი-მ, რომელიც მართვის მოწმობის პრაქტიკული გამოცდების ჩატარებაზე იყო პასუხისმგებელი, ბოროტად გამოიყენა სამსახურებრივი უფლებამოსილება. კერძოდ, ის პრაქტიკულ გამოცდაზე ჩაჭრილ კანდიდატებს შეგნებულად ამისამართებდა მასთან დაახლოებულ პირთან, სადაც ისინი დამატებით პრაქტიკულ მეცადინეობებს გადიოდნენ, სანაცვლოდ კი ბრალდებული მატერიალურ სარგებელს იღებდა.
საქმეზე გამოძიება სისხლის სამართლის კოდექსის 332-ე მუხლის პირველი ნაწილით მიმდინარეობს, რაც სამსახურებრივი უფლებამოსილების ბოროტად გამოყენებას გულისხმობს.
ამასთან, გამოძიების პროცესში გამოიკვეთა მომსახურების სააგენტოს კიდევ სამი თანამშრომლის – გ.ს-ს, ლ.ყ-ს და ა.ბ-ს მხრიდან დისციპლინური გადაცდომის ნიშნები. ჩატარებული სამსახურებრივი შემოწმებით დადგინდა, რომ აღნიშნული პირების ქმედებების შედეგად სამ მოქალაქეზე მართვის მოწმობები არასწორად გაიცა.
დარღვევების გამო, აღნიშნული თანამშრომლების მიმართ გამოყენებულია დისციპლინური სახდელი – სამსახურიდან დათხოვნა.
