თემურ ქათამაძე, ბათუმის აქციების ერთ-ერთი სიმბოლო, რომელიც ადმინისტრაციულად იყო დაკავებული, დღეს, გაათავისუფლეს სამტრედიის იზოლატორიდან. გათავისუფლებიდან რამდენიმე წუთში იგი კვლავ დააკავეს.
თემურ ქათამაძე მუჰაჯირების შთამომავალია და უკვე რამდენიმე წელია საქართველოს მოქალაქეობის მიღებას უშედეგოდ ცდილობს. ამჟამად იგი საქართველოში ცხოვრობს. სავარაუდოდ, დაკავება სწორედ საემიგრაციო საკითხს უკავშირდება, კერძოდ მას საქართველოში ყოფნის ვადა ამოეწურა.
მედროშე ბაბუს, იგივე თემურ ქათამაძის დაკავების ფაქტზე შინაგან საქმეთა სამინისტროს ჯერ განმარტებები არ გაუკეთებია.
ინფორმაციისთვის: 11 იანვარს, ქათამაძე დააკავეს საკონსტიტუციო სასამართლოსთან, ის დაადანაშაულეს პოლიციელის მოთხოვნისადმი დაუმორჩილებლობაში. დაკავების შემდეგ თემურ ქათამაძე აცხადებდა, რომ პოლიციელების მხრიდან მას შეურაცხყოფა მიაყენეს, გარდა ამისა, აღნიშნავდა, რომ პოლიციის შენობაში მას უთხრეს: „არ ხარ საქართველოს მოქალაქე, შენს ქვეყანაში წადიო“.
