მოსახლეობამ ქობულეთი-ოზურგეთის დამაკავშირებელი საავტომობილო გზა გადაკეტა და სატრანსპორტო მიმოსვლა შეაფერხა. ადგილობრივებმა ეს გადაწყვეტილება მას შემდეგ მიიღეს, რაც სამართალდამცავების მხრიდან ყურადღება ვერ მიიქციეს.
ქაქუთში მცხოვრებლების თქმით, სოფელში, თითქმის ერთი თვეა უცნობი პირი გადაადგილდება, რომელიც სახლებს ქვას ესვრის, ზოგიერთ შემთხვევაში კი საკუთრებაში უკანონოდ შეჭრას ცდილობს.
“რა უნდა გვეშველოს არ ვიცი, არავინ ყურადღებას არ გვაქცევს. ჩემთან იყო წინა დღეს, ფანჯარაზე მოაკაკუნა ღამე და გაიქცა. მთელი სოფელი ჩასაფრებულია და ვერ იჭერენ. ვის უნდა მივმართოთ ასეთ სიტუაციაში თუ არა პოლიციას, რომელიც დგას, იცინის და არაფერს აკეთებს რომ დაიჭიროს,” – ამბობს ერთ-ერთი ადგილობრივი “აჭარა თაიმსთან” საუბრისას.
ჩვენ დავუკავშირდით შინაგან საქმეთა სამინისტროს. უწყებიდან დამატებითი ინფორმაციის მიღების შემთხვევაში მასალა განახლდება.
