კობა ფარტენაძის მიმართ დისკრიმინაციული ნიშნით ძალადობისა და მუქარის საქმეზე ბრალდებულებს სასამართლომ 7-7 ათასი ლარის ოდენობით გირაო შეუფარდა.
ბრალდებულები პატიმრობაში დარჩებიან, ვიდრე გირაოს თანხას არ გადაიხდიან.
სასამართლოს გადაწყვეტილებით, მათ წინასასამართლო სხდომამდე, კვირაში ერთხელ, პოლიციაში გამოცხადების ვალდებულება დაეკისრათ. ასევე, ბრალდებულებს დაზარალებულთან კომუნიკაცია აეკრძალათ.
პროცესზე გაირკვა, რომ ბრალდების მხარე დანაშაულის მოტივად „სექსუალური ორიენტაციის შეუწყნარებლობაზე“ მიუთითებს. თუმცა, ეს გარემოება დანაშაულის მაკვალიფიცირებელ ნიშნად არ არის მითითებული და სავარაუდო მოტივს უკავშირდება.
სასამართლოს გადაწყვეტილებას პროკურატურა გაასაჩივრებს.
ბრალდებულების ადვოკატი მიიჩნევს, რომ სასამართლომ საქმის გარემოებები ობიექტურად შეაფასა და შესაბამისი გადაწყვეტილება მიიღო.
პროცესზე ორივე ბრალდებულმა მოსამართლეს ერთნაირი პოზიციით მიმართა: „ბოდიშს მოვიხდი“.
„დღეს მოსამართლე ყველაზე უსამართლო გადაწყვეტილების გამომტანი გახდა“ – ასე შეაფასა კობა ფარტენაძემ სასამართლოს გადაწყვეტილება.
კობა ფარტენაძის საქმეზე ბათუმში ძალადობისა და მუქარის ბრალდებით 2 პირი დააკავეს
