ბათუმში, ჯავახიშვილის ქუჩა N74-ში მერიამ ეზო ორჯერ მოასფალტა, თუმცა ადგილობრივები აცხადებენ, რომ სამუშაოები უხარისხოდ შესრულდა. მათი თქმით, ასფალტი სამუშაოების დასრულებიდან მალევე დაზიანდა.
“რა მდგომარეობაშია ასფალტი კი ხედავთ, ამოცვივდა კენჭები და მტვერი მოდის სახლში. ძველი ასფალტი სჯობდა, რაც იყო,” – თქვა ჩვენთან საუბრისას ნანული ცინცაძემ.
კორპუსის ამხანაგობის თავმჯდომარემ, პრობლემის შესახებ ბათუმის მერიას არაერთხელ აცნობა, თუმცა უშედეგოდ. მას შემდეგ, რაც ჩინოვნიკებმა პრობლემის აღმოსაფხვრელად არაფერი გააკეთეს თალიკო რუხაძემ ასფალტის დაზიანებული ნაწილები მერიაში, კერძოდ, კეთილმოწყობის სამსახურს მიუტანა. როგორც “აჭარა თაიმსთან” საუბრისას რუხაძემ აღნიშნა, გაფუჭებული ასფალტი სამსახურის უფროსის კაბინეტში დაყარა, რადგან უფროსმა და მოადგილემ მასთან შეხვედრა არ ისურვეს.
“ასფალტი არის ძალიან ცუდი. ორჯერ დაგებულია, თუმცა უხარისხოდ. ამოიყარა, თქვენ თვითონაც ხედავთ რა მდგომარეობაშია. ადამიანები ვართ და წესიერ მოპყრობას ვიმსახურებთ. ვინაიდან ყურადღებას არ გვაქცევენ იძულებული ვართ სხვა ზომებს მივმართოთ. ჩემი ეზოს სახელით ასფალტის ნატეხებს კეთილმოწყობის სამსახურში მივიტან,” – განაცხადა თალიკო რუხაძემ “აჭარა თაიმსთან” საუბრისას.
ჩვენ დავუკავშირდით ბათუმის მერიას, თუმცა უწყებაში საკითხზე კომენტარი არ გაკეთდა.
