საქართველოში მოქმედი ოპოზიციური პარტიები – ახალი, გირჩი-მეტი თავისუფლება, დროა, ევროპული საქართველო, ეროვნულ-დემოკრატიული პარტია, თავისუფლების მოედანი, სტრატეგია აღმაშენებელი და ფედერალისტები – ერთობლივი განცხადებით ეხმიანებიან BBC-ის გამოქვეყნებულ გამოძიებას, რომლის მიხედვითაც 2024 წლის საპროტესტო აქციების დროს შესაძლოა გამოყენებული ყოფილიყო პირველი მსოფლიო ომის დროინდელი ქიმიური ნივთიერება.
ოპოზიციის განცხადებით, ქვეყანაში სადაც „ყველა სახელმწიფო ინსტიტუტი ერთი ადამიანის კონტროლქვეშაა“, მიუკერძოებელი შიდა გამოძიების ჩატარება წარმოუდგენელია. მათი თქმით, „ქართული ოცნება“ არ აპირებს საერთაშორისო საგამოძიებო ჯგუფის მოწვევას, მაშინ როცა მსგავს შემთხვევაში პასუხისმგებელი და ანგარიშვალდებული ხელისუფლება სწორედ ამ გზას აირჩევდა.
პარტიები სანდო საერთაშორისო ინსტიტუტებს მოუწოდებენ, დაიწყონ დამოუკიდებელი საგამოძიებო პროცესი, დადგინდეს ფაქტობრივი გარემოებები, პასუხისმგებელი პირები და აღიკვეთოს აკრძალული ნივთიერებების გამოყენების ნებისმიერი საფრთხე.
სათანადოდ, ოპოზიცია საერთაშორისო პარტნიორებს მიმართავს თხოვნით, განიხილონ დროებითი შეზღუდვების შესაძლო დაწესება იმ აღჭურვილობასა და სპეცსაშუალებებზე, რომლებიც შეიძლება გამოყენებულ იქნას მოქალაქეების წინააღმდეგ და საერთაშორისო ნორმების დარღვევით. მათი განცხადებით, ასეთი შეზღუდვა პრევენციული ნაბიჯი იქნება ადამიანის უფლებების შემდგომი დარღვევების თავიდან ასაცილებლად.
