14 იანვარს აჭარის ტელევიზიასთან მორიგი აქცია გაიმართა, სადაც ჟურნალისტებმა და რიგითმა მოქალაქეებმა საზოგადოებრივი მაუწყებლისგან პირდაპირი ეთერი მოითხოვეს. აქციის მონაწილეები მიიჩნევენ, რომ ტელევიზიამ უნდა გაშუქოს მნიშვნელოვანი საკითხები, მათ შორის მზია ამაღლობელის დაკავება და პატიმრობა.
ეთერის გამო, თავდაპირველად ტელევიზიის შენობაში ეთერ თურაძე, ონლაინ მედია „ბათუმელების“ დამფუძნებელი შევიდა, სადაც სტუდია მზადდებოდა საეთეროდ. თუმცა, როგორც თავად აღნიშნა, სტუდიაში პოლიციელები შევიდნენ და იგი და წამყვანი სივრციდან ძალდატანებით გამოიყვანეს. ამის შემდეგ არხმა პირდაპირ ეთერში გასვლა ვერ შეძლო.
“ველოდებოდი სტუდიაში. შემოვიდა წამყვანი, გაიკეთა მიკროფონი, მოიტანეს სკამები, წყლის ჭიქები, ჩართეს სტუდია, ამასობაში შემოცვივდნენ პოლიციელები და ძალის გამოყენებით გამომიყვანეს… ჩემი აჭარის ტელევიზიიდან გამოძევება უზრუნველყვეს შსს-ს ფორმიანმა თანამშრომლებმა. შესასვლელში არიან ნიღბიანი პირები, რომლების აპირებდნენ ჩემთვის მოეკიდებინათ ხელი. არანიღბიანმა პირებმა გამომაძევეს ეთერიდან. გილოცავთ, აჭარის ტელევიზიის თანამშრომლებო, თქვენ ხართ შინაგან საქმეთა სამინისტროს დანაყოფი,” – განაცხადა ეთერ თურაძემ ტელევიზიის წინ საპროტესტო აქციაზე.
მოგვიანებით, ტელევიზიამ შეძლო ეთერში გასვლა და ჟურნალისტები მიიწვიეს პირდაპირ ეთერში. აღნიშნულ ეთერში სამმა ჟურნალისტმა მზია ამაღლობელის საქმეზე ისაუბრეს. მათ ტელევიზია ტენდენციურობასა და მიკერძოებაში დაადანაშაულეს, რაც მათივე შეფასებით, არხის ერთ-ერთი დამახასიათებელი ფუნქციაა. ეთერ თურაძემ განაცხადა, რომ აჭარის ტელევიზია აქტიურად “აშავებს” ადამიანებს და მას არ ენდონ.
აქციის მონაწილეები განაცხადეს, რომ ტელევიზიამ შეწყვიტოს პოლიტიკური ნარატივის გამოყენება და უფრო აქტიურად და პროფესიულად გააშუქოს საზოგადოებრივი მნიშვნელობის საკითხებს.
