სასტუმრო “შერატონში” მომხდარი სისხლის სამართლის დანაშაულის საქმეზე დასაბუთებული განმარტებები დღემდე არ გაკეთებულა. პროკურატურა და შინაგან საქმეთა სამინისტრო, მიუხედავად მაღალი საჯარო ინტერესისა, კვლავ არ აკეთებენ განმარტებებს, მათ შორის მედიასთან კომუნიკაციის ვალდებულება უგუვებელყოფილია.
აღსანიშნავია, რომ დანაშაულიდან თითქმის ერთი თვე გავიდა და კითხვები იმის შესახებ, დაიკითხნენ თუ არა საქმის მთავარი ფიგურანტები, გიორგი მანველიძე და დიმიტრი სამსახაძე, ჯერჯერობით უპასუხოდ რჩება. სწორედ ისინი არიან ის პირები, რომლებსაც ზვიად ქორიძე და გიორგი გახარია თავდამსხმელებად ასახელებენ. კითხვებს უპასუხოდ ტოვებენ ბრალდების მთავარი ადრესატები „ქართული ოცნების“ წევრები, გიორგი მანველიძე და დიმიტრი სამხარაძე.
დამატებითი კითხვა, რომელიც საზოგადოებაში ჩნდება, არის ის, თუ რატომ არ აძლევენ დაზარალებულებს სასტუმრო “შერატონში” მომხდარი თავდასხმის ამსახველ კადრებს, მიუხედავად იმისა, რომ პროკურატურასა და სასტუმროს აქვთ კანონიერი ვალდებულება, უზრუნველყონ ამ ინფორმაციასთან წვდომა. ამ გარემოებამ გააჩინა დამატებითი კითხვები, რაც სახემწიფოს მხრიდან მიკერძოებასა და არაობიექტურ გამოძიებაზე მეტყველებს.
ამ ეტაპზე არ არსებობს პასუხი არც იმ კითხვაზე, იყო თუ არა გიორგი მანველიძე საგამოძიებო ორგანოში დაკითხვაზე ან რატომ ემალება ის მედიას. ჟურნალისტებს მოლოდინი ჰქონდათ, რომ „ქართული ოცნების“ წარმომადგენლები ამ საკითხზე განმარტებებს გააკეთებდნენ, თუმცა ისინი კითხვებს თავს არიდებენ, მათ შორისაა არაკონსტიტუციური უმაღლესი საბჭოს თვითგამოცხადებული დეპუტატი რამაზ ჯინჭარაძე.
“თუ ის (გიორგი მანველიძე) რაღაც ფორმით არის ამ საქმის ფიგურანტი დიდი ალბათობით დაიბარებენ მას. გამოძიების მასალები არაა ისე საჯარო, რომ მე ვიცოდე რამე. უნდა ჰქონდეს საზოგადოებას ინფორმაცია, ამიტომ მიმართეთ სასამართლოს და პროკურატურას,” – აღნიშნა “აჭარა თაიმსთან” საუბრისას დავით გაბაიძემ, არაკონსტიტუციური უმაღლესი საბჭოს თვითგამოცხადებული თავმჯდომარემ.
არაკონსტიტუციური უმაღლესი საბჭოს კიდევ ერთმა თვითგამოცხადებულმა დეპუტატმა განაცხადა, რომ საქმის ირგვლივ მას მხოლოდ ის ინფორმაცია აქვს, რაც საზოგადოებას. ცოტნე ანანიძის თქმით, მიუხედავად იმისა, რომ გიორგი მანველიძე მისი მეგობარია და მასთან ყოველდღიური შეხება აქვს, ის აღნიშნავს, რომ მოცემულ საქმეზე მხოლოდ კანონით გათვალისწინებული ცნობები მოისმენა.
მედიის კითხვებზე და საქმის ირგვლივ კონკრეტულს ვერაფერს ამბობს გიორგი მანველიძის კიდევ ერთი თანაგუნდელი. ტიტე აროშიძემ არც იმ კითხვას უპასუხა თუ რატომ მოქმედებს შინაგან საქმეთა სამინისტრო შერჩევითი სამართლის პრინციპით.
ინფორმაციისთვის: სასტუმრო “შერატონში” რამდენჯერმე კადრების გასაჯაროვების მოთხოვნით საპროტესტო აქცია გაიმართა, თუმცა საერთაშიროსო ბრენდი სისხლის სამართლის დანაშაულის ამსახველი ვიდეოს დაზარალებულებს არ გადასცემს. ბოლო საპროტესტო აქციაზე კი მენეჯერმა განაცხადა, რომ პროკურატურამ ყველა კადრი წაიღო და მათ ასლებიც კი არ დაუტოვეს.
ცნობისთვის: გიორგი გახარია, პარტია „გახარია საქართველოსთვის“ ლიდერი, მიიჩნევს, რომ თავდასხმის უკან ბიძინა ივანიშვილი დგას.
აქვე დაგაინტერესებთ: ბათუმში მომხდარ ინციდენტზე, რომლის შედეგადაც „საქართველოსთვის“ ლიდერი გიორგი გახარია და ჟურნალისტი ზვიად ქორიძე დაშავდნენ, შინაგან საქმეთა სამინისტრომ გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.
გარემოება: ჯგუფური თავდასხმისას გიორგი გახარია და ზვიად ქორიძე დაშავდნენ. ბათუმის რესპუბლიკური საავადმყოფოს ექიმის, თაკო შანთაძის თქმით, გიორგი გახარია კლინიკაში სასწრაფო დახმარების ბრიგადამ 02:34 საათზე მიიყვანა. პაციენტს აღენიშნებოდა ცხვირის ძვლის მოტეხილობა და თავის ტვინის შერყევა. შედარებით მსუბუქი სახის დაზიანება მიაყენეს ზვიად ქორიძეს.
კონტექსტი: აღსანიშნავია, ის ფაქტი, რომ პოლიციამ შემთხვევის ადგილი მხოლოდ რამდენიმე საათის შემდეგ შემოსაზღვრა. გიორგი გახარიას ძლიერი სისხლდენა ჰქონდა, რამაც იატაკსა და ავეჯზე კვალი დატოვა. თუმცა, სისხლის კვალი მოგვიანებით, სასტუმროს თანამშრომლებმა წაშალეს, რაც სავარაუდოდ, მტკიცებულებების განადგურების მოტივით მოხდა.
