საქართველოს სტატისტიკის ეროვნული სამსახურის მონაცემებით, აჭარის ავტონომიური რესპუბლიკის მოსახლეობის რიცხოვნობა გაზრდილია. თუმცა ეს ზრდა არ უკავშირდება რეგიონში ცოცხლად დაბადებულთა რაოდენობის ზრდას. ამ მხრივ, სიტუაცია კვლავ სავალალოა, რადგან 2025 წელს უფრო ნაკლები ბავშვი დაიბადა, ვიდრე 2024 წელს. მნიშვნელოვანი გარემოებაა ისიც, რომ გარდაცვლილთა რიცხოვნობა გაზრდილია.
აჭარაში მოსახლეობის რაოდენობის, ცოცხლად დაბადებულთა და გარდაცვლილთა რიცხოვნობის შესადარებლად, პირობითად, ავიღეთ მონაცემები 2019 წლიდან (პანდემიამდე პერიოდი) 2026 წლის ჩათვლით (მოსახლეობის რიცხოვნობა მოცემულია 2026 წლის 1 იანვრის მდგომარეობით, ხოლო შობადობისა და გარდაცვალების ბოლო მაჩვენებლები – 2025 წლის მიხედვით).
მონაცემები აჩვენებს, რომ 2026 წელს მოსახლეობის რიცხოვნობა გაზრდილია, ძირითადად, ბათუმის მუნიციპალიტეტში. განსაკუთრებით თვალშისაცემია 2023 წელი, როცა ქალაქის მოსახლეობის რაოდენობა, 2022 წელთან შედარებით, 5,500 ადამიანით გაიზარდა. სხვადასხვა ექსპერტის მოსაზრებით, ეს, შესაძლოა, უკავშირდებოდეს რუსეთის მიერ უკრაინაში დაწყებულ ომს, რის შემდეგაც საქართველოში ათასობით რუსეთის, ბელარუსისა და უკრაინის მოქალაქე შემოვიდა. მათი ნაწილი დარჩა და აქ თავისი კომპანიები დააფუძნა.
შეგახსენებთ, რომ საქსტატმა მოსახლეობის ბოლო აღწერა 2024 წელს ჩაატარა. აღწერის შედეგებმა აჩვენა, რომ, 2023 წელთან შედარებით, მოსახლეობის რაოდენობა მკვეთრადაა შემცირებული ხულოს მუნიციპალიტეტში.
დიაგრამაზე ჩანს, რომ აჭარის მოსახლეობის რაოდენობა ერთბაშად 5 900 ადამიანით გაიზარდა 2022 წლის შემდეგ და უკვე 2023 წელს 361 400-ს მიაღწია. უკრაინაში რუსეთის მიერ დაწყებული სრულმასშტაბიანი ომის შემდეგ, ჯამში, აჭარის მოსახლეობის რაოდენობა გაზრდილია 57 700 ადამიანით. რა თქმა უნდა, ეს ზრდა მხოლოდ საქართველოში მუდმივად მცხოვრები უცხო ქვეყნის მოქალაქეების რაოდენობას არ უკავშირდება. აქ გასათვალისწინებელია ქვეყნის სხვა რეგიონებიდან აჭარაში, განსაკუთრებით, ბათუმში მიგრირებული მოსახლეობის ეფექტიც. თუმცა, იმავე საქსტატის თანახმად, საქართველოში მოსახლეობის რიცხოვნობის ზრდა ძირითადად უცხო ქვეყნის მოქალაქეების რაოდენობის ზრდამ გამოიწვია.
იმას, რომ აჭარაში (და მთლიანად საქართველოშიც) მოსახლეობის ბუნებრივი მატება შობადობის მაჩვენებლებით არაა გამოწვეული, საქსტატის მონაცემებიც ადასტურებს – ბოლო რამდენიმე წელია, ცოცხლად დაბადებულთა რიცხოვნობა იკლებს, ხოლო გარდაცვლილთა რაოდენობა იზრდება.
თუ ცხრილ 2-ს დავაკვირდებით, ვნახავთ, რომ 2019-2025 წლებში აჭარაში, ჯამურად, 36 457 ადამიანი დაიბადა, ხოლო 25 980 ადამიანი გარდაიცვალა. შესაბამისად, ბუნებრივმა მატებამ (სხვაობა ცოცხლად დაბადებულთა და გარდაცვლილთა შორის) 10 477 ადამიანი შეადგინა. ეს გარემოება კარგად ჩანს დიაგრამა 2-ზე.
დიაგრამა 2 აჩვენებს, საანგარიშო პერიოდში ბუნებრივი მატების მაჩვენებელი ყველაზე მაღალი იყო 2019 წელს. პანდემიურ წლებში ის შემცირდა (გასათვალისწინებელია, რომ ამ პერიოდში, კოვიდპანდემიის გამო, გაიზარდა გარდაცვლილთა რაოდენობა). 2022 წელს ბუნებრივი მატების ზრდა შეინიშნებოდა, თუმცა პოზიტიური დინამიკა დიდხანს არ გაგრძელდა და 2024 წელს მკვეთრად მოიკლო, 2025 წელს კი მაჩვენებელი კიდევ უფრო გაუარესდა.
ამდენად, 2024-2025 წლებში ცოცხლად დაბადებულთა რიცხოვნობა საგრძნობლად იკლებს, გარდაცვლილთა რიცხოვნობა კი გაზრდილია. ამის მიუხედავად, აჭარის მოსახლეობის რაოდენობა საანგარიშო პერიოდში (2019 წლიდან 2026 წლის 1 იანვრის ჩათვლით) 64 200 ადამიანით გაიზარდა, თუმცა ამ ზრდის განსაკუთრებული წილი სწორედ 2022-2026 წლებზე მოდის, რაც ნიშნავს, რომ რუსეთის მიერ უკრაინაში დაწყებული სრულმასშტაბიანი ომის ეფექტმა თავისი მნიშვნელოვანი გავლენა იქონია.
დაკავშირებული თემები ⇓
საქართველოს მოქალაქეები ყველაზე ხშირად თურქეთსა და რუსეთს სტუმრობდნენ
საქართველოში სიკვდილიანობის მაჩვენებელი გაიზარდა
საქართველოში კანალიზაციის სისტემაზე მიერთებული მოსახლეობის მხოლოდ 54.1%-ია
საქსტატის მტკიცებით, წინასწარი მონაცემები, საქართველოში მოსახლეობის რიცხოვნობა 3.9 მილიონია
