ქიმწმენდის ობიექტების ფუნქციონირებისთვის ახალი ტექნიკური რეგლამენტი დამტკიცდა, რომელიც 2024 წლის სექტემბრიდან ამოქმედდება. საქართველოს ჯანდაცვის სამინისტროს ცნობით, ცვლილების მიხედვით, აკრძალულია ქიმწმენდის ობიექტების საცხოვრებელ, სამედიცინო, საგანმანათლებლო და სააღმზრდელო დაწესებულების შენობებში განთავსება.
„განსაზღვრულია მათგან დაშორების მინიმალური მანძილიც. დიდი ქიმწმენდებისთვის, სულ მცირე, 100 მეტრი, მინი ქიმწმენდებისთვის კი – სულ მცირე, 50 მეტრი. მინი ქიმწმენდისთვის ასევე დასაშვებია საზოგადოებრივი მნიშვნელობის დაწესებულებების ზონებში, ადმინისტრაციულ შენობებსა და სასტუმროებში განთავსება სპეციალური სტანდარტების მიხედვით.
ახალი რეგლამენტის მიხედვით, ქიმწმენდის საწარმო ასევე ვალდებული იქნება, სამუშაო სივრცეში უსაფრთხოებისა და ჯანმრთელობის დაცვის მოთხოვნები უზრუნველყოს. აქ დასაქმებულთა შრომის პირობებისა და მათი უფლებების დაცვას ზედამხედველობას შრომის ინსპექციის სამსახური გაუწევს. ქიმწმენდის საწარმო ასევე ვალდებულია, აწარმოოს სამუშაო ზონის ჰაერში მავნე ნივთიერებების შემცველობის პერიოდული მონიტორინგი, რომელთა ზღვრულად დასაშვები კონცენტრაციების კონტროლს ატმოსფერულ ჰაერში გარემოს დაცვისა და სოფლის მეურნეობის სამინისტროს გარემოს ზედამხედველობის დეპარტამენტი განახორციელებს“, – აღნიშნულია ჯანდაცვის სამინისტროს ინფორმაციაში.
