საქართველოს ახალგაზრდა იურისტთა ასოციაციამ (საია) და მედიის განვითარების ფონდმა (MDF) საკონსტიტუციო სასამართლოს მიმართეს სარჩელით, რომლითაც ასაჩივრებენ „მოქალაქეთა პოლიტიკური გაერთიანებების შესახებ“ საქართველოს ორგანული კანონის იმ ნორმებს, რომლებიც არასამთავრობო ორგანიზაციებსა და ინდივიდებს „გაცხადებული საარჩევნო მიზნების მქონე სუბიექტებად“ მიიჩნევს.
არსებული რეგულაციებით, ანტიკორუფციულ ბიუროს, სასამართლოს თანხმობით, შეუძლია ასეთ სუბიექტებისაგან მოითხოვოს განსაკუთრებული კატეგორიის პერსონალური ინფორმაცია, მათ შორის პირადი მონაცემები და ნებისმიერი ტიპის საიდუმლო ინფორმაცია, გარდა სახელმწიფო საიდუმლოების. კანონი ასევე განსაზღვრავს, რომ ამ სტატუსის მქონე პირებს გარკვეული შეზღუდვები ეკისრებათ ცენტრალური საარჩევნო კომისიის მიერ ხმების შეჯამების დღემდე.
დაფინანსების კუთხით, „გაცხადებული საარჩევნო მიზნების მქონე სუბიექტებს“ თანხის მიღება მხოლოდ საქართველოს მოქალაქეებისგან შეუძლიათ, ხოლო დამფინანსებლის სახელი, გვარი და პირადი ნომერი უნდა მიაწოდონ ანტიკორუფციულ ბიუროს, რომელიც ამ ინფორმაციას საჯაროდ აქვეყნებს საკუთარ ვებგვერდზე.
საიასა და MDF-ის განცხადებით, ანტიკორუფციული ბიურო და სასამართლოები კანონს ისე განმარტავენ, რომ შეზღუდვები ვრცელდება არა მხოლოდ მათზე, ვინც ღიად აცხადებს ხელისუფლებაში მოსვლის სურვილს, არამედ იმ ორგანიზაციებსა და პირებზე, რომლებიც უბრალოდ ახდენენ ხელისუფლების კრიტიკას ან ამომრჩევლებს მოუწოდებენ, არ მისცენ ხმა კონკრეტულ პოლიტიკურ პარტიას. ორგანიზაციების თქმით, ზოგ შემთხვევაში, ბიურო და სასამართლო ხელისუფლების მიმართ გამოთქმულ კრიტიკასაც კი პოლიტიკური მოწოდების ფორმად აღიქვამენ, რაც მათ საქმიანობას ხელოვნურად ზღუდავს.
სარჩელში აღნიშნულია, რომ ასეთი მიდგომა არღვევს საქართველოს კონსტიტუციით გარანტირებულ გამოხატვის თავისუფლებას (მე-17 მუხლი) და გაერთიანების თავისუფლებას (მე-22 მუხლი).
საიასა და MDF-ის შეფასებით, კანონის ამგვარი გამოყენება საფრთხეს უქმნის არასამთავრობო სექტორის დამოუკიდებლობასა და მათ დემოკრატიულ ფუნქციას.
