ევროკომისიამ 19 დეკემბერს გამოაქვეყნა ანგარიში, რომელიც პარტნიორი ქვეყნების მიერ უვიზო მიმოსვლის ფარგლებში აღებული ვალდებულებების შესრულებას ეხება.
დოკუმენტში აღნიშნულია, რომ საქართველომ, არსებული ტენდენციების გაგრძელების შემთხვევაში, შესაძლოა, საბოლოოდ დაკარგოს ევროკავშირთან უვიზო მიმოსვლის სტატუსი.
ანგარიშის მიხედვით, ევროკომისია სერიოზულ შეშფოთებას გამოთქვამს საქართველოში ფუნდამენტური უფლებებისა და თავისუფლებების მდგომარეობის გამო. დოკუმენტში ხაზგასმულია, რომ ევროკომისიამ არაერთხელ მოუწოდა საქართველოს ხელისუფლებას, დაუყოვნებლივ გადაედგა ნაბიჯები არსებული პრობლემების მოსაგვარებლად და შეესრულებინა ვიზალიბერალიზაციის ფარგლებში გაცემული რეკომენდაციები, თუმცა პროგრესი არ დაფიქსირებულა.
ევროკომისიის შეფასებით, საქართველომ დაარღვია ვიზალიბერალიზაციის დიალოგის დროს აღებული არაერთი ვალდებულება და ვერ დანერგა ვიზის შეჩერების მექანიზმის მეშვიდე ანგარიშში წარმოდგენილი რეკომენდაციები. დოკუმენტში აღნიშნულია, რომ უკუსვლას აქვს სისტემატური და მიზანმიმართული ხასიათი, რის გამოც კომისია შესაბამისი ზომების მიღებას განიხილავს შეცვლილი ვიზის შეჩერების მექანიზმის ფარგლებში, რომელიც ძალაში 2025 წლის 30 დეკემბერს შევა.
ანგარიშში ასევე მითითებულია, რომ შესაძლო შეზღუდვები ეტაპობრივად შეიძლება ამოქმედდეს. პირველ ეტაპზე, უვიზო მიმოსვლის შეჩერება შესაძლოა შეეხოს საქართველოს ხელისუფლების მიერ გაცემული დიპლომატიური, სამსახურისა და ოფიციალური პასპორტის მფლობელებს, რომლებიც, ევროკომისიის შეფასებით, ძირითადად პასუხისმგებელნი არიან რეკომენდაციების შეუსრულებლობაზე. ამასთან, ევროკომისია არ გამორიცხავს, რომ მეორე ეტაპზე უვიზო მიმოსვლის შეჩერება მთელ მოსახლეობაზეც გავრცელდეს, იმ შემთხვევაში, თუ საქართველოს ხელისუფლება არსებულ პრობლემებს არ მოაგვარებს.
დოკუმენტში ხაზგასმულია, რომ უკიდურეს შემთხვევაში საქართველომ შესაძლოა სრულად დაკარგოს უვიზო სტატუსი და გადაინაცვლოს ევროკავშირის იმ მესამე ქვეყნების სიაში, რომელთა მოქალაქეებს ევროკავშირში შესასვლელად ვიზა სჭირდებათ.
ანგარიშის საზოგადოებრივი წესრიგისა და უსაფრთხოების ნაწილში ევროკომისია აღნიშნავს, რომ მაშინ, როდესაც პარტნიორი ქვეყნების უმეტესობა ანტიკორუფციული ვალდებულებების შესრულებას ახერხებს, საქართველომ მანამდე გატარებული რეფორმების ნაწილი გააუქმა. ასევე საუბარია ქვეყანაში არსებულ უსაფრთხოების რისკებზე, რომლებიც, ევროკომისიის შეფასებით, რუსულ გავლენასთან არის დაკავშირებული.
